Meeqqat assammik arsartarnerat tusiappoq
Inersimasut assammik arsarneranni siuartut Nunatta qeqqaneersuupput. Taamatullu ingerlalluarnerup sorlaqarfigaa Børne Cup ukiorpassuarni iluatsilluartumik ingerlanneqartartoq.
- Assammik arsartartut kattuffiata pikkorinnerit aallussimavai meeqqat pilliutigalugit, Nagdlúnguup siulittaasua Lena Ravn Davidsen oqarpoq, GHFip ileqquusumik Ilulissani ataatsimeersuarnerani.
Nagdlúnguup oqallissaarutini arfininngornermi ataatsimeersuarneri saqqummiuppaa meeqqat assammik arsartarnerisa nukittorsarnissaa siunertaralugu. Taakku meeqqat unammersuarnerinik aaqqissueriartarsimagaluarput nalunaarfigineqarpianngitsumik. Taamaattumik kissaatigaat nuna tamakkerlugu meeqqat unammisalernissaat isorliunerusuni assammik arsarneq soqutigineqarnerulersinniarlugu.
- Imatulli paasineqassanngilaq pikkorinnerit unitsinneqarnissaat akerlerigipput. Meeqqat nuannaartorisaat aallunneqartariaqarput ukiorpassuarniliuna GHFip meeqqat sumiginnarsimagai, Lena Ravn Davidsen oqarpoq.
Klubbit ujartorpaat nuna tamakkerlugu meeqqat unammersuartalernissaat, timersuutini allani taama pisoqartarmat.
- Sisoraatinik oqilaniunnermi Aasianni GM-qarmata meeqqat ilaatigut qulinik ukiullit peqataapput. Taakku unammersuarnerat pisortatigoortuunngikkaluarpoq, kisianni meeqqat eqqarsaatigineq ajorpaat pisortatigoortuunersoq nuannaarutigineruaat nuna tamakkerlugu unammersuarnermi peqataanertik, Aasianni Norsaq HC-meersoq Tom Ostermann Søholm aamma GHF-ip siulersuisuiniittoq oqarpoq.
Qeqqani ineriartortitsinermi aamma aqqutaapput håndboldskolet ingerlanneqartarnerat. Assammik arsartartut tusaamasat soorlu Jakob Larsen Nuummut tikittarput tusaamasanik allanik ilaqarlutik aasaanerani håndboldskolemut soqutinnilersitseqataasartunik.
Angutit nunanut allanut unammisartut sungiusaasuata Niels Møllerip GHF-mi siulersuisunngortut ilisimatitsinermik taallugu ataatsimeeqatiserai tassani saqqummiunniarlugu piukkunnartut ineriartortinnissaannut siunnersuut.
- Ukioqqortussutsimut naleqqussakkamik assammik arsartarneq Danmarkimi iluatsilluartumik ingerlanneqarpoq, tamannalu itisilerlugu nassuiarusuppara, Niels Møller oqarpoq.
GHF-mi siulersuisut nassuerutigaat meeqqanik sullissineq pitsaanerusinnaasoq. Taamaammat imminnut pisussaaffilerput meeqqanut suliniarnertik nukittorsarniarlugu.
Qeqqani Børne Cup ingerlanneqartarpoq klubbit ingerlataannik assammik arsartut kattuffiat avaqqullugu, tamannalu iluatsilluartumik 1995-miit ingerlanneqarsimavoq.
