Meeqqat arsaarinnissutaanerminni oqaatsiminnik annaasaqartarnerat iliuuseqarfiginiaraat
Nunap inoqqaavi Canadallu naalakkersuisui aalajangerput nunap inoqqaavisa meerartaasa oqaatsiminnik kulturiminnillu annaasaqartarnerat millisarneqassasoq.
Canadami ministerit nunap inoqqaavinut tunngassutilinnik suliaqartartut nunap inoqqaavisa aquttuinik sapaatip akunnerata siuliani ataatsimeeqateqarput.
Ataatsimiinnermut siunertaavoq nunap ajornartorsiutaata annertuup aaqqiivigineqarnissaa; tassalu nunap inoqqaavisa meerartaat meeqqat kulturiannik oqaasiinillu paasisimasaqanngitsunut inissinneqartarnerat.
Ajornartorsiutaavoq inuit, indianerit metisillu meerartaat ajornartorsiuteqartut ilaquttaminniit qimagutitinneqartarmata ilaqutariinnullu qaqortumik amilinnut meerarsianngortinneqarlutik, taamaalillutik amerlasuutigut namminneq kulturiminnut oqaatsiminnullu atassutaaruttarlutik.
Angajoqqaarsianngortut amerlasuutigut meeqqat oqaasii kulturiallunniit paasisinnaanngilaat, tamannalu meeqqanut sivisuumik ajortumik sunniuteqartarpoq.
Ataatsimiinnermi ministerit aqutsisullu isumaqatigiissutigaat aaqqiissutissaq nunaqarfinni aaqqinneqassasoq, meeqqallu kingorna ilaquttaminniit qimagutitinneqassanngisut. Angajoqqaarsiat nassaarineqassapput meeqqat namminneq ilaqutaasa akornanni, assersuutigalugu aanaa-aataakkuminni ilaquttaminniluunniit allani.
Periarfissattaaq allat ataatsimiinnermi saqqummiunneqarput, tamakkulu maanna nunap immikkoortuini aqutsisunit nunap inoqqaavisalu suliniaqatigiiffiinit misissorluarneqassapput. Sammisaq pillugu upernaamut ataatsimeeqqittoqassaaq.
Canadami meeqqat arfineq marluk inorlugit ukiullit syv procentii Inuit, indianerit metisillu meerartaraat, meeqqalli meerarsianngortinneqartartut paaqqinniffinnulluunniit inissineqarsimasut affaat nunap inoqqaavisa meerartaraat.