Meeqqat aalasassapput
Meeraaqqerivimmi Nukariinni, meeqqerivimmi Piaqqami meeqqallu ornittagaanni Tikiusaami sulisut, meeqqat angajoqqaat qaaqqusallu, timersorneq aallaavigalugu perorsaariaaseqalernertik Ilulissani timersortarfimmi ippassaq malunnartippaat.
Timersornerup ulluinnarni perorsaariaatsitut meeqqerivinni taakkunani atorneqalernissaa siunertaavoq, sulisullu allagartartaarnissamut siornali pikkorissarnermi peqataasimasut ulloq manna tikillugu takutereerpaat timersorneq aqqutigalugu perorsaariaaseq atorneqarsinnaasoq.
Qaasuitsup Kommuniani Perorsaanermi siunnersorti Thora S. Madsen ima oqarpoq:
- Perorsaanerup timersornertallip atorneratigut meeqqat eqqarsartaasiat, timikkullu ineriartornerat kisimik sunnerneqarneq ajorput, inunnulli allanut attaveqarniarnerannut aamma sunniuteqartarpoq.
Meeqqeriviit timersorneq aallaavigalugu perorsaariaaseqalernerat Timersoqatigiit Kattuffiannit aamma ilassilluarneqarpoq.
- Meeqqat mikineriniit aaqqissuussaasumik timersorneq aamma aalaneq perorsaariaatsitut ulluinnarni atorneqalermat Timersoqatigiit Kattuffiannit nuannaarutigaarput. Nunatta sinnerani illoqarfinni allani suliniut tigulluarneqarumaartoq neriuutigaarput aallunneqalerlunilu, Timersoqatigiit Kattuffianni pisortaq Carsten olsen oqarpoq.
Nunaqarfinni ulluunerani paarsisut Perorsaanermik Ilinniarfimmi assinganik pikkorissartinneqarnissaat tullinnguuppoq. Taamaalilluni meeqqerivinni Qaasuitsup Kommunianiittuni perorsaariaaseq timersornertalik siunissami ilaatinneqarnerulerniassammat.
