Meeqqanut tunngasunik suliat misissoqqissaarneqalerput
Namminersorlutik Oqartussat Nakkutilliinermik ingerlatsiviata kommunimut juunimi isornartorsiuinera tamatumunnga peqqutaavoq.
Kommuneqarfik Sermersuup suliaminik ingerlatsinerliormat meeqqat inuusuttullu ikiortariaqartut sumiginnagaasut nalunaarusiami aasaq manna inerniliunneqarpoq.
AAMMA ATUARUK Sermersuumi meeqqat pisortanit sumiginnagaapput
Taamaammat kommunip meeqqanut inuusuttunullu tunngasunik suliai tamarluinnaasa misissoqqissaarneqassasut, kommuni nittartakkamini allappoq.
- Nakkutilliinermi nalunaarusiami qulaarneqarpoq, maannamut suliniutaareersut amigarsimasut, taamaammat nuannaarutigilluinnarpara annertuumik suliniuteqarnissamut ikiortissarsiorneq maanna piareerlugu iluatsissimasoq, kommunimi meeqqanut ilaqutariinnullu ataatsimiititaliami siulittaasoq, Uju Petersen, oqarpoq.
Suliat 2.200-t misissorneqalertut
Taassuma saniatigut isumaginninnermut immikkoortortaqarfik allanngortiteriffigineqarsimavoq taavalu aamma immikkoortortaqarfimmi sullissisut artornarsinnaasunik suliaqartaramik misilliutiminnik imaajaaqatigineqartalissapput.
Kommuneqarfik Sermersuup kukkunersiuisuisa Deloittep kommunimi meeqqanut ilaqutariinnermullu tunngasunik suliani ukiuni tulliuttuni sisamani ikorfartueqataassaaq.
Deloittep suliassat meeqqanut tunngasut 2.200-sut tamaasa piffissami tassani misissussavai.
AAMMA ATUARUK Pisortat sumiginnaapput - politikeriunngitsut
- Suliat ingerlasut suleriaatsittalu ineriartortinnissaannut pilersaarummi nutaamik isiginnilluni sulisut tamaasa peqataatillugit nalilersuiffiginissaat pingaaruteqarpoq. Kukkussutivut ilikkarfigisarutsigit aatsaat suliatsinnut pikkorinnerulersinnaavugut, meeqqanut ilaqutariinnullu ingerlatsivimmi pisortaagallartoq, Helene Horsbrugh oqarpoq.
Deloittep suleqataaneranik 3.5 millionit koruunit aningaasartuutigineqassapput.
AAMMA ATUARUK Meeqqat illersuisuata nakkutilliisut nalunaarusiaat tupaallaatigaa
