Hans Lyngep meeqqat kræftimik nappaateqartut aningaasanik katersuuniarpai
Hans Lyngep meeqqat kræftimik nappaateqartut ikiorusuppai.
Taamaammat Nuuk Ski Club peqatigalugu aningaasanik katersuiniarneq aggustip aappaaniit qulingiluaata tungaanut ingerlalussaq aallartippaa.
Katersuiniarneq allaanerulaamik pissaaq, Hans Lyngemi Kapisilinniit Nuup tungaanut pisussaaq, taamaaliornermigut meeqqat kræfteqartut isiginiarneqarnerunissaat angorusuppaa.
-Neriuutigaara nappaassuup ilisimaneqarnerulernissaa - meeqqat aamma taassumunnga sorsummata. Kapisilinniit Nuummut pisunniarpunga meeqqat kræfteqartut isiginiarneqarnerulernissaat anguniarlugu. Pisoqataaneq akeqanngilaq, pisunnittali ingerlanerani inuit aningaasaleerusuttut aningaasaliissuteqarsinnaapput, Hans Lynge oqarpoq.
Aningaasat katersorneqartut meeqqanuinnaq atugassanngorlugit aggustip qulingata kingorna Neriuffik Nuummiittumut tunniunneqassapput. Hans Lyngep neriuutigaa aningaasat 5.000-50.000 koruuninik katersisinnaassalluni.
Meeqqat atugaanut iluaqutaasinnaasunik, soorlu pinnguat, atuakkat, sammisassaqartitsinerit timimulluunniit nukittorsaataasinnaasunik, soorlu sikkilit immikut naleqqussakkanik, løbehjulinik, spillerluni issiaviit, spillerutinik allanillu Hans Lynge aqqutissiuerusuppoq.
- Qanigisara ivianngimigut kræfteqarnikuugami. Taamani meeqqat kræfteqartut aamma takusarpakka. Eqqarsaatigisarparalu meeqqat kræftimik eqqugaasut isiginiarneqarnerat amigartoq. Taamaammat aningaasanik katersuuniarlugit aalajangerpunga, isumassarsisoq nassuiaavoq.
Aningaasanik katersuiniarnermi ilisarnaat qimmeq Ansi tassaavoq pisuttuaqatigiinissami ilisarnaat. ’Ansi-løbet’ Kapisilinniit Nuummut pisoqatigiinneq ukiut tamaasa pisalersussatut pilersaarutaavoq.
Suliffeqarfiit inuillu ataasiakkaat aningaasanik katersuiniarnermi taperseerusuttut Nuuk Ski Club-ip bank kontoanut 6471-1520773-mut qulequtserlugu: ’Donation til Neriuffik’ aningaasaliisoqarsinnaavoq.
Katersuiniarluni pisutsitsinerit ukiut tamaasa aggustip aallartinnerani ingerlanneqartassaaq.
