KNR Meeqqanut inuusuttuaqqanullu aaqqissuisoqarfik ilusinikkiartortoq
![Katrina Lindberg & Angajo Lennert-Sandgreen](/sites/default/files/styles/image_934x467/public/article_images/img_0043_angajo_kathrina.jpg?itok=QntuQUM0)
Tusagassiortoq Katrina Lindberg marsip aallaqqaataani meeqqanut inuusuttuaqqanullu aaqqissuisoqarfimmi aaqqissuisutut atorfinippoq. Katrina nutaaliorluni KNR-ip tusagassiuutai tamaasa aqqutigalugit meeqqanut inuusuttuaqqanullu aallakaatitassiat nukittorsarneqarnerannut siuttuussaaq.
Katrina, aliikkusersuisartumik, nipilersortartumik isiginnaartitsartumillu Angajo Lennert-Sandgreen-imik suleqateqassaaq, aamma marsip aallaqqaataaniit 2016 meeqqanut inuusuttuaqqanullu aaqqissuisoqarfimmi pilersaarusiortutut atorfinittoq.
Marluullutik meeqqat inuusuttuaqqallu tunaartaralugit Radiomi, TV-mi minnerunngitsumillu inuit attaveqatigiittarfiisigut aallakaatitanik suliaqassapput.
- Katrinap Angajo-llu aallartinnissaat qilanaaraarput. Taakkua nutaaliorlutik meeqqanut inuusuttuaqqanullu aallakaatitassanik nutaanik pilersitsinissaminnut nukissaqarluarput kajumissuseqarlutillu, Masaana Egede KNR-imi radiomi pisortaq oqarpoq.
Meeqqanut inuusuttuaqqanullu aaqqissuisoqarfimmi nutarterissapput aallakaatitassanillu nutaanik pilersitsillutik, kisianni aamma KNR-imi meeqqanut inuusuttuaqqanullu aallakaatittakkanik pioreersunik ineriartortitseqqinnermik suliaqassapput.
Katrina Lindberg pillugu naatsumik
Katrina Lindberg 30-nik ukioqarpoq, Narsami inunngorpoq peroriartorlunilu. Tusagassiortutut ilinniakkamik naammassinnerlaajuvoq, erneqarpoq marlunnik ukiulik. Pop-imik nipilersortartoq Justin Bieber tusarnaassallugu nuannarisaraa, sunngiffimminilu ilaqutaminut ikinngutiminullu kaagiliuussinermik soqutigisaqarluni.
Meeqqanik inuusuttuaqqanillu suliaqarnissara qilanaarisorujussuuara. Qularinngilara pit-saasunik pilersitsissalluta. Ajornanngippat silarsuarmik nutaamik pilersitsisinnaassalluta. See you later kids, Katrina Lindberg oqarpoq.
Angajo Lennert-Sandgreen pillugu naatsumik
Isiginnaartitsisartoq, ilitsersuisoq, nipilersortartoq quiasaarisartoq allarpassuarnillu sulialik, taama 29-nik ukiulik Angajo Lennert-Sandgreenip cv-ni allassinnaavai. Ukiorpassuanngortuni Angajo nunatsinni najugaqarfinnut assigiinngitsunut angalasarsimavoq nipilersoqatigiit nuannarineqartut ilagalugit, pingaartumillu meeqqat nuannarilluagaat Hinnarik inuttaaffigalugu. Angajop sunngiffimmini sammisarai pattagissap saavani pattarujoorneq imaluunniit snowboard-terneq.
Nunatsinni najugaqarfinni tamaginni meerarpassuit aliikkusersornikuuakka, KNR-imilu aalla-kaatitsivimmi pilersaarusiortutut aallakaatitsisutullu suliamik nangitsinissara qilanaareqaara, Angajo Lennert-Sandgreen oqarpoq.
Allanik apeqqutissaqaruit Radiomi pisortaq Masaana Egede saaffigineqarsinnaavoq mailikkut: meg@knr.gl imaluunnit oqarasuaat 36 15 00.