Medina nunatsinnukarniarunnaarpoq
Nipilersorluni tusarnaartitsinernik aaqqissuinerit Nipiaa Rock Festival aamma Nuuk Festival tupaallannartumik tusarlerneqarput. Ukiormanna tusarnaartitsinissani tusaamaneqarnerpaat Medina nalunaarpoq ukiormanna nunatsinnukarsinnaajunnaarluni.
- Assorujussuaq pakatsissutigaarput Medina tusarnaartitsinissatsinnut takkussinnaajunnaarluni nalunaarmat, Nipiaa Rock Festivalimik aaqqissuisuniit Peter Olsen oqarpoq.
- Piffissarujussuaq atorlugu nunatsinnukarnissaa iluatsinniarsimavarput. Taamaammat qanorluunniit oqassalluni nalunarpoq maanna tusarnaartitsinissanut qaammataajunnaartoq takkussinnaanani nalunaarmat. Piffissaq taama sivikitsigisoq atorlugu taama tusaamasaatigisumik nassaarnissaq ajornakusoortorujussuuvoq, Peter Olsen oqarpoq.
Medina Nuummi tusarnaartitsisussaagaluarpoq aggustip 31-at Aasiannilu septemberip aallaqqaataani.
Nipiaa Rock Festivalimi peqataasussat sinneri takkutissapput. Sisamanngorneq aggustip 30-at Circumpolar Soundscape ilaatigut Nivé Nielsenimit peqataaffigineqartoq aallarniissaaq.
Nipiaa Rock Festival ingerlaqqissaaq tallimanngorneq aggustip 31-at tassani appisimaassammata Thornstone, Nanook aamma Ole Kristiansen Band.
Nipiaa Rock Festival naggaserlugu appittussaagaluarput Medina, Small Time Giants aamma Uummat.
Nunatsinni tusarnaartitsinissat sioqqutilaarlugit Medina Tysklandimi tusarnaartitsisussaagaluarpoq maannali nalunaarpoq Tysklandimi angalanerup kinguninnguaq nunatsinnukarnissani angumerisinnaajunnaarlugu.
