New Zealandimi toqoraaneq malugineqarpoq, aamma Nunavumi
Canadap issittortaani inuiaqatigiit islamiusut arlaliupput. Iqalunni Inuvimmilu moskéqarpoq.
Iqalunni muslimit 300 missaanniipput. New Zealandimi toqoraaneq tamarmik attortissutigisimavaat.
Iqalunni moskép silataani illoqarfiup innutaasa ilaat uumataasat mikisut apummut ikkussuussimavaat. Moskémeersoq Ibn Houssein CBC Northimut oqaaseqarpoq piffimmi muslimit eqqissiallannissaanut iluaqusersimagaat.
Ibn Housseinili nangilluni oqarpoq tamanna ilutigalugu muslimit massakkut Iqalunni isumannaannertik oqaluuserilersimagaat, tassami ilaanneeriarlutik muslimiunertik pillugu asissorneqarneq misigisarsimagaat.
- Tamannalu ernumanarpoq, tassami Iqalunni aallaasit amerlaqimmata, oqarpoq.
Syed Asif Ali, Nunavumi islamisiortut kattuffianni siuttoq, CBC-mut oqaaseqarpoq neriulluni pisup alianartup taassuma inuit paasitissagai inuiaat tamarmik akornini ersoqatigiinneq akuersaarnerlu annertuumik pisariaqartinneqarmata.
- Paasisariaqarparput taamaatut isummertoqartarmat, sillisimasariaqarpugut inuillu taama isummersimasut soqutiginngitsuussaaginnarnagit, oqarpoq.
Iqalunnili inuit amerlanerpaartaat inutsialassuupput, Ibn Houssein oqarpoq, sapinngisannguatsinnillu inuiaqatigiit tapersersorniarpavut arfininngornerit tamaasa Iqalunni inunnut pisariaqartitsisunut nerisassanik agguaassilluta.
- Taamaaliornitta islamisiortunik akeqqersimaarneq pakkersimaassagaa neriuutigaarput takutillugulu maani Nunavumi inuiaqatigiit ilagigaatigut, oqarpoq.
