Mary Saqqamut tikeraarpoq

Kunngissap nulia Mary ullumi nunaqarfimmut Saqqamut tikeraarpoq tassanilu meeqqerivimmiut atuartullu qinngasaaruttarnerup akiorniarnerani ilikkakkaminnik takutitsiffigaat.
Allattoq Noah Mølgaard
juunip 05-at 2012 19:26

Kunngissap nulia malittaasoq umiarsuarmut nakkutilliissummut Ejnar Mikkelsenimut ilaallutik Saqqamut tikipput ullup qeqqata missaani, tassanilu nunaqarfimmi aqutsisut siulittaasuanit Mikkel Jensenimit, Uno-mit tikilluaqquneqarput.

Silagissuup ataani tikeraartoqarneq iluatsillugu Kunngissakkut meraaat Prins Christian, Prinsesse Isabella, Prins Vincent aamma Prinsesse Josephine titartakkanik nassiussiffigineqarput.

- Atuartut titartakkaminnik atuarfimmi saqqummersitsipput periarfissarlu iluatsillu titartakkat sisamat Kunngissakkut meeraannut arnaat aqqutigalugu nassiuppagut, Saqqami atuarfiup pisortaa Jonas Jensen KNR-imut oqaluttuarpoq.

Kunngissap nuliara meeqqerivik atuarfillu pulaarpai taakkunanilu erinarsorfigineqarlunilu qinngasaaruttarneq pillugu suliniut Kammagiitta pillugu nassuiaanneqarpoq. Nunaqarfimmiullu bamserujussuarmik peqarput iluani inuttaqartartumik taannalu Kammarujummik taagorpaat. Taassuma tikeraat nalunaaquttap akunneri marluk sinnilaarlugit Saqqamiinneranni malittarai.

Kunngissap nulia aamma nunaqarfimmiunit tunissuteqarfigineqarpoq. Qalipagaq eqqumiitsuliortup Johannes Nathanielsenip titartagaa tunniunneqarpoq. Qalipakkap assiliartarai illut filmip Qivittup Saqqami immiunneqarneranit ilisimaneqartut.

Kunngikkormiunit tikeraartoqarneq nalunaaquttap akunneri marluk missaliorlugit sivisussuseqarpoq Kunngissallu nulia helikopterimik Ilulissanut uteriarpoq. Aqagu Atuarfik Jørgen Brønlund pulaassavaa tassani Kammagiitta aamma ingerlanneqarmat.

Aamma meeqqat arpannerat aallartissavaa meeqqallu ujaminnattaassaannik agguaassalluni.

Qimarnguik aamma pulaarneqarumaarpoq tikeraarnerlu naggaserlugu borgmester Jess Svane qaaqqussisoralugu nereqatigiinneqarumaarluni.