Martha Lund Olsen: Najukkani eqqartuussiviit matuneqarnavianngillat

Inatsisip allanngortinneqarnissaata ilaatigut siunertaraa, najukkani eqqartuussiviit nukittorsarnissaat.

Inatsisissatut siunnersuutip Inatsisartuni akuerineqarnerata kingorna, suliassaq folketingimut oqaluuseritinneqassaaq tamanna pissalluni upernaap massuma ingerlanerani. Inatsisissatut siunnersuut tamanna, aasaru juulip aallaqqaataaniit atuutilersussatut siunniunneqarpoq.

Kalaallit Nunaannili eqqartuussisarnermut inatsisissatut allannguut, Danmarkimi Inatsisinut ministeriaqarfimmit siunnersuutaasoq, suli Inatsisartuni aappassaaneerlugu oqaluuserineqanngitsorluunniit tamanna isornartorsiorneqartareerpoq.

Nunatsinni eqqartuussisuuneq, Søren Søndergaard Hansen isornartorsiuisuuvoq, oqarluni inatsimmik allannguiniarneq isumaqatiginagu, tassami inatsisissatut siunnersuuteqartoqarmat najukkani eqqartuussiviit suliarisartagaat saqitsaassutit, Nunatta Eqqartuussivianit suliarineqartalerpata tamanna najukkani eqqartuussiviit atorunnaarsinneqarnissaannik siunertarineqarmat.

Inatsisinut Atuutsitsinermut Naalakkersuisup, Martha Lund Olsen-ip, eqqartuussisuunerup isoranrtorsiutaat tamakku pillugit ima oqarpoq.

- Pinerluuteqarsimanermi eqqartuusseriaatsit, tassa pinerluuteqarsimasup inuunera atugarisai allallu eqqartuussinermi aallaaviussasut pingaaruteqarpoq aamma tamakku suliassat sinerissami suliarineqartarnissaat pingaaruteqarluni. Taamaattumik najukkani eqqartuussiviit atorunnaarsinniarneqanngillat, naak taama isumaqartoqaraluartoq.

Martha Lund Olsenip ilanngullugu oqaatigaa, Nunatsinni eqqartuussisuunerup isornartorsiutai, Naalakkersuisunit tusaaniarneqarlutik nalilersorneqarsimasut.

- Inatsisip allannguutissaani siunnersuummi, najukkani eqqartuussivinni suliassat saqitsaassutinut tunngasut Nunatta Eqqartuussiviani suliarineqartarnissaat siunnersuutaasoq arlalinnit saqitsaassutaavoq, taamannalu eqqummaariffigineqarluni Naalakkersuisunit eqqartorneqarpoq aamma eqqartorparput najukkani eqqartuussivinni suliassat taama amerlatigilersimatsillugit, politikkikkut qanoq iliuuseqartoqartariaqalersoq. Inatsisinut Atuutsitsinermut Naalakkersuisoq, Martha Lund Olsen taama oqarpoq.

Allannguutissatut siunnersuut Atassummit isumaqatigineqarpoq, taamaattorli taakku isumaqarput, inuit saqitsaassutaat najukkani eqqartuussivinni suliarineqartarnissaat Naalakkersuisunit pingaartinneqassasoq neriuutigalugu.