Martha Abelsen: Kommuneqarfik tunoqqullugu isumaqatigiissusiortoqanngilaq

Kommuneqarfik Sermersooq tunoqqullugulusooq kommuninut ataatsimoortumik tapiissutit pillugit isumaqatigiissusiortoqarsimaneranik borgmesteri Asii Chemnitz Narup Aningaasaqarnermut Naalakkersuisumik Vittus Qujaukitsumik isornartorsiuivoq, Kommuneqarfik Sermersuullu Kanukokamut ilaasortaanera kommunalbestyrelsimit aamma nalilersoqqinneqartariaqartoq oqaatigalugu, isornartorsiuinerli tunngavissaqanngitsoq, Kanukokap siulittaasua Martha Abelsen oqarpoq:

- Taamaattoqanngilaq. Oqareernittuut, ataatsimoortumik tapiissutit killigititaasa aningaasat tassunga tunngasut juulimili isumaqatigiissutigineqarput, taakku attorneqanngillat. Taakkuukua iluanni agguaariaaseq qanoq issanersoq pillugu Naalakkersuisut allannguutissatut siunnersuuteqalersaartut. Vittus Qujaukitsup tusagassiutinut nalunaaruteqarnerani taama atuarpara, Kanukokap siulittaasua Martha Abelsen oqarpoq.

Aningaasaqarnermut Naalakkersuisup Vittus Qujaukitsup, Naalakkersuisullu, borgmesterit sinneri peqatigalugit maannamut isumaqatigiissutigineqarsimasunik sanioqqutaarisimanerat, Kommuneqarfik Sermersuup borgmesteriata, Asii Chemnitz Narupip naammagisimaanngeqaa.

Kommuneqarfik Sermersuumut ataatsimoortumik tapiissutit 20 millionit koruuninik ilanngaavigineqarnissaat, aningaasallu paarlattuanik Kommune Kujallermut Qaasuitsullu Kommunianut tunniunneqarnissaat, Naalakkersuisut aappaagumut aningaasanut inatsisissatut siunnersuummut allannguutissatut siunnersuutigereeraallu, Asii Chemnitz Narup taama qisuariaateqarpoq:

- Oqaatigisariaqarpara allatut paasineqarsinnaanngillat illuatungeriit isumaqatiginninniarnerit aqqutigalugit aalajangersaaqatigiittarnerat naalakkersuisuninngaannit atorunnaarsinneqarpoq, Asii Chemnitz Narup ippassaq oqarpoq, Kommuneqarfik Sermersuullu Kanukokamut ilaasortaanerata kommunalbestyrelsimit naliliivigeqqinneqarsinnaanissaa ilaatigut aamma oqaatigalugu.

Kommuneqarfik Sermersuup Kanukokamut ilaasortaanerata naliliivigeqqinneqartariaqarsinnaanissaa borgmesterip Asii Chemnitz Narupip ippassaq ilaatigut oqaatigaa, Martha Abelsenilu Kommuneqarfik Sermersuup kommunalbestyrelsiani ilaasortaammat tamanna qanoq isumaqarfigineraa aperaarput, akivorlu:

- Uanga kommunalbestyrelsimi ilaasortatut massakkut isummernissara kissaatiginngilara, Kanukokap siulittaasuatut sianerfigineqarama taamatullu akissallunga, Kanukokap siulittaasua Martha Abelsen, Siumut sinnerlugu Kommuneqarfik Sermersuup kommunalbestyrelsiani aamma ilaasortaasoq oqarpoq.