Mariina nipilersortuni dommeriussaaq
Qasigiannguani katersortarfimmi unammineq ingerlanneqassaaq arfininngorneq aallarnerfigalugu appisimaarneqassammat aaqqissuussinermi imigassartaqanngitsumik ingerlanneqartussami.
Nipilersoqatigiit ataasiakkaarlutillu appisimaartussat 13-ussapput arfininngornerit pingasut ingerlaneranni ajugaasussarsisussaat dommerit tallimaasut naliliisoralugit.
- Unamminermi siunertaavoq Qasigiannguani nipilersortarnerup siuarsarnissaa aammalu efterskolertut Qasigiarmiunut akuunerulernissaat, taama oqaluttuarpoq KNRip Qasigiannguani ilanngutassiortua Inge-Marie Rosing.
Arfininngornermi nipilersoqatigiit ataasiakkaartullu arfinillit sassaqqaassapput pingasut finalemut apriilip aappaani ingerlanneqartussamut ingerlaqqissallutik. Taava allat arfineq marluk arfininngorneq marsip 26-iat sassassapput aamma taakkunannga pingasut finalemut anngutissallutik.
Dommerit tallimat naliliisuussapput. Erinarsortartup Mariina Schmidtip nalilersussavaa erinarsornikkut takutitsinerat, taava Søren Langep nipilersoqatigiinni "Asuki"kkunni ilisimaneqartup nipilersuutinik atuinerat nalilersussavaa. Taakku aamma dommerioqatigissavaat nipilersornermut toqqaannartumik attuumassuteqanngitsut scene-mi takutitsinerit isiginnaartullu qisuariarnerannik nalilersuisussat poinit 1-miit 10-mut tunniutinnginneranni. X-factorimi ilisimaneqartutut karakteriliinnginnermi oqaasertaliilaartarumaarput.
Aaqqissuisuuvoq peqatigiiffik FC Raaja. Siunertaavoq taamatut unammiuaartarnerup ukiut tamaasa uteqqiattunngornissaa aappaagumut eqqarsaatigineqassamaarluni pisortatigoortumik ateqarluni ingerlalissanersoq.
