Maratonimi GM seqernup kaviinnarfiani

Siornatigut Nuuk maraton nunatsinni maratonimut pissartanngorniuffiusaraluartqo Timersoqatigit kattuffiat GIF aalajangerpoq illoqarfiit aaqqissuisuusut allanngorartinneqalissasut. Ukiormanna ASP Aasiaat aaqqissuisuuvoq arpannerlu pissaaq juunop 29-at.
Allattoq Noah Mølgaard
juunip 04-at 2012 08:08

Aaqqissuisunit ilimagineqarpoq peqataasut 300-ut missaanniissasut maratonimi GM unammissutigineqalerpat. Arpattartullu ilisimaneqartut arlallit peqataaniarlutik ilimasaaripput. Angutini oqilanerit 2,50 timer arpannissaat ilimagineqarpoq arnanilu ajugaasoq nalunaaquttap akunnera ataaseq missaliorlugu kingulliullutik ukiuni siuliini apuuttarput.

- Arpannerup pisortatigoortumik nuna tamakkerlugu pissartanngorniuffiussusanngornera ikinngitsut maraton siunnerfigalugu sungiusarusulerannik kinguneqarpoq. Amerlapput qanoq piginnaassuseqarnertik misilinniarlugu peqataaniartut tamannarpiarluni tassa maratonimi qitiusoq – imminut unammineq, Hans Rafaelsen GIF.gl-mut oqarpoq.

Arpanneq aallartissaaq nalunaaqutaq 21.00 arpattullu amerlanersaat unnuap qeqqata kingorna apuutissangatinneqarput isiginnaartunit alutorineqassagunaqisumik. Aaqqissuisut imeruersaatinik nerisassanillu tuniniaaniarput aammalu nipilersortoqarumaarluni.

- Arpannermi isorartussutsit unammiffissat tassaapput 41,195 kilometer, 21 kilometer, 10,5 kilometer aamma 4,2 kilometer, Hans Rafaelsen oqaluttuarpoq, ilanngullugulu oqaatigaa nalunaarnissamut periarfissaq kingulleq tassaasoq ulloq taanna arpaffissaq nalunaarnerlu ASPp illuutaani pissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq