MAPI-p siulittaasua: Meeqqat hashimik pujortarniarlutik imminnut atortittarput
Erseqqissaaneq: Ilanngutassiami siusinnerusukkut Kalaallit Nunaanni Politiit suliamut pineqartumut atatillugu oqaaseqarusunngitsut allassimagaluarpoq. Tamanna eqqortuunngilaq. Vicepolitiinspektørip, Jan Geislerip oqarnera naapertorlugu politiit meeqqat akilersillutik atortittarnerannut atatillugu "kommunimit eqqartorneqartoq ilisarivissinnaannginnerarnerata" saniatigut allamik oqaasissaqanngillat. Politiit sunarpiaq ilisarisinnaannginnerarnerlugu erseqqissaatigerusunngilaat.
Sisimiuni meeqqat akissarsiutigalugu atortittarnerat ilisimaneqalersimasoq Qeqqata Kommuniata tusagassiuutinut ippassaq nalunaarutigaa.
KNR-ip Qeqqata Kommuniani qinikkat ulloq naallugu attaveqarfiginiarsarai. Atugarissaarnermut immikkoortortami pisortaq, Paneeraq Olsen aamma oqaloqatigaarput. Ataasiinnarlu suliamut atatillugu kisimi oqaaseqarusuppoq, tassa atugarissaarnermut ataatsimiititaliami siulittaasoq Juliane Enoksen.
Taassuma taama pisoqartarnera alianartuusoraa, maannali paasineqarnera pitsaasuunerarpaa.
- Pisoq nuanniikkaluarluni iluaqutitaa suliniarsinnaanngoratta pappiaranngorluni allassimasunngorami uppernarsaatitaqarluni, taanna oqarpoq.
Kommunip oqarnera naapertorlugu illoqarfimminni meeqqat akissarsiutigalugu atortittarsimanerat qanorpiaq ittuunersoq KNR-imit paasisinnaanngilarput.
Kisianni peqatigiiffimmi MAPI-mi siulittaasoq, Laila Berthelsen meeqqanut tunngatillugu sulianik suliaqartartoq aamma oqaloqatigaarput. Taassumalu Sisimiuni meeqqanik akissarsiutigalugu atortittartoqarnera ilisarisinnaavaa.
Meeqqat pineqartut ammut 15-it tikillugit ukioqarput, inissinneqarsimasuullutillu. Taakku hashimik pujortarniarlutik atortikkajunnerupput.
Laila Berthelsenip oqarnera naapertorlugu inissiisarfiit assigiinngitsut tamanna ilisimalluarpaat, iliuuseqarfiginaguli.
- Inissiisarfiit ilisimalluarpaat. Meeqqat unnuami qimaasarput, inissiisarfiillu politiinut sianereeraangamik iliuuseqaqqissinnaaneq ajornerarput, meeqqallu namminneq angerlanngikkaangamik ujaarineqartarput.
- Meeqqat arfineq-pingasunik ukiullit tikillugit ukioqartut meeqqat allat inissiisarfimmiittut ilagalugu unnuariaasarput. Taamaalillutik pinerluttuliornermi avatangiiseqalertarput, kisianni taakku akissarsituigalugu atortinneq ajorput, Laila Berthelsen.
Sumiiffinni assigiinngitsuni ajornartorsiutaasoq
Laila Berthelsenip oqarnera naapertorlugu Qeqqata Kommunia meeqqanik inissiisarfimmiittunik akissarsiutigalugu hashimik pujortarniartartunik kisimi ajornartorsiuteqanngilaq.
- Kommunini inissiiffiusartuni tamani ajornartorsiutaavoq. Illoqarfinni tamani taama pisoqartarpoq. Pingaartumik illoqarfinni arlalinnik inissiisarfeqartuni, taanna KNR-imut oqarpoq.
- Hashimik pissarsisinnaanngikkaangamik imminnut akiliutigisariaqartarput.
Laila Berthelsenip oqarnera naapertorlugu illoqarfimmi susoqartarneranik oqaluttuartunit meeqqanit Sisimiunut inissinneqarnikuusimasunit nammineerluni attavigineqarnikuuvoq.
