Sisimiuni meeqqat akissarsiutigalugu atortittarnerat ilisimaneqalersimasoq

Meeqqat pillugit angalasartut nalunaarusiaat uissuumminartoq kommunalbestyrelsimut ullumi saqqummiunneqarpoq.

Allattoq Christine Hyldal

decembarip 19-at 2023 17:42

Nutserisoq Connie Fontain

Meeqqat pillugit angalasartut Sisimiuniipput – tamannalu uissuumminartumik nalunaarusiortoqarneranik kinguneqarpoq: Meeqqammi akissarsiutigalugu atortittarnerat ilisimaneqalersimavoq.

Qeqqata Kommunia tusagassiuutinut nalunaarummi marlunngorneq ualisoq allappoq.

- Sisimiuni politiit suleqatigalugit Meeqqat pillugit angalasartut najukkami inuusuttunit persuttaasarnerup annertusiartornera pillugu isumasiueqatigiinnermi meeqqat akornanni akissarsiutigalugu atortittarnerit ilisimaneqalersimavoq, tusagassiuutinut nalunaarummi allassimavoq.

Nalunaarusiaq kommunalbestyrelsimut ullumi saqqummiunneqarpoq.

Meeqqat inuusuttullu 38-t katsorsarneqarnissamut innersuunneqartut

Meeqqat pillugit angalasartut Sisimiuniikkamik meeqqat inuusuttullu 18-it inorlugit ukiullit kinguaassiuutitigut naapertuilluanngitsuliorfigineqarsimasut qulaajarlugillu katsorsartussaavaat. Taakkulu aamma suliat meeqqanut inuusuttunullu kinguaassiuutitigut ernumanartumik kanngunarsaasumilluunniit pissusilersortunik pasitsaassaqarfiusimasut misissortussaallugit.

Meeqqat inuusuttullu 38-t katsorsarneqarnissaannut innersuunneqarput.

Taakkunannga meeqqat 17-it oqaloqatigineqarnerat naammassineqarput.

Meeqqat pillugu angalasartut Sisimiunut angalaqqipput, sinneruttullu 17-it katsorsarneqarnissamik aamma periarfissinneqarlutik.

PAASISSUTISSAT

Meeqqat pillugit angalasartut kalaallit danskillu nunatsinni meeqqanut inuusuttunullu innarlerneqarsimasut pillugit suliniutinut pitsanngorsaaniarneraat.

Meeqqat pillugit angalasartut suliniutit Sisimiuni, Upernavimmi Nanortalimmilu 2022-mi aallartippaat.

Angalasartut 2022-mi marsip 25-anit 2023-mi februaarip 24-anut Sisimiuniipput.

Meeqqat pillugit angalasartut tassaapput tarnip pissusianik ilisimasallit marluk Nuummi Isumaginninnermut Aqutsisoqarfiup ataani atorfeqartut.

Kingunerluuteqartut PTSD-qartullu

Tusagassiuutinut nalunaarummi allaaserineqarpoq kommunimi ilaqutariinnut sullissiviup meeqqat inuusuttullu sakkortuumik misigisaqarsimasut soorlu PTSD-rtut amerlasuut maluginiarneqarsimasut. Sisimiuni atugarissaarnermut immikkoortortamik qanimut suleqatiginnittoqarsimanngitsoq meeqqat pillugit angalasartut aamma nalilerpaat.

Oqartussat immikkoortortaqarfianni meeqqanut tunngasunik sulianik arlaqaqisunik artukkerneqarsimanerat patsisaasut ilagaat. Taamaattumik immikkoortortaqarfinnit allanit nalunaarutiginnissamut nalornisoqartarpoq, suliallu malitseqartinneqarnissaat ilimagineqarneq ajormat – suliat politiinut unnerluutigineqarneq ajorput.

- Kommunalbestyrelsip ataatsimiinnerani ilaatigut oqaatigineqarpoq Qeqqata Kommuniata kinguaassiuutitigut atornerluinerit akuersaanngilluinnaraat, Meeqqat pillugit angalasut innersuussutaat piaartumik sulissutigineqassasoq ataatsimiinnermi akuersissutigineqarpoq, tusagassiuutinut nalunaarummi allassimavoq.

Nutaarsiassami kukkunermik nassaarsimaguit uunga allaffigineqarsinnaavugut.