Maniitsumi sullivimmi ilinniartitsineq iluatsitsiffiulluartoq
Ilinniarfinni sammiviit ilinniartut piginnaanngorsarfigisinnaasaat sisamaapput. Tassalu sanasutut sulineq, betonilerineq, motoorilerineq igaffimilu sulineq. Aasami sulinngiffeqarnerup kingorna sammivinnik marlunnik ilaneqarsinnaanera neriuutigineqarpoq. Tamanna iluatsissinnaassappat assartugassalerinermik it-lerinermillu ilaneqassagunarput.
-Ilinniartuutivut suliffeqarnermi pisariaqartunik ilinniaqqaartussaapput. Piffissaq eqqorlugu suliartortassapput, suleqatigiilluarsinnaassapput akisussaaqataanermillu takutitsillutik. Ilimagisatsinnit pitsaanerujussuarmik ingerlasimavoq. Aallartikkatta takkuttut procentinngorlugit 60-iunissaat ilimagisimagaluarparput, maannali 97-98%-t missaat takkuttarput. Iluatsitsiffiulluartutullu tamanna oqaatigisariaqarpoq, ilinniarfinni ilinniartitsisut ilaat Henrik Stark Karlsen knr.gl-mut oqaluttuarpoq.
Sullivimmi ilinniartut illoqarfimmut tamarmut iluaqutaasussanik suliaqartarput. Juullimi ullorissat illoqarfiup qeqqani atugassat illoqarfiullu paaqqinnittarfiinut meeqqanut qamutit, taakkulu suliniutit siullersaraat ilinniartullu maannakkorpiaq arfineq pingasunik teqeqqulinnik illuaraliorput. Taakku atuarfiup eqqaani napparneqassapput, illoqarfimmilu sunngiffimmi sanaaluttartut tuniniaaffigisinnaassavaat.
-Suliarisamik atorneqarnerat takussallugu ilinniartutsinnut pingaaruteqartupilussuuvoq. Utertitsivigineqartarnerput maannamut pitsaasupilussuuvoq. Ilinniartuutitta tassuuna suliffeqarnermut piareersarsinnaanissaat neriuutigaarput, juullimilu sulinngiffiup kingorna danskisut, tuluttut matematikkimilu pikkorissaanerit aallartissavagut. Ilinniartuutitta ilarpassui atuagarsornikkut piginnaasaat killeqartupilussuupput, pikkorissaanittalu tamatumunnga iluaqutaanissaa neriuutigaarput, Henrik Stark Karlsen nassuiaavoq.
Ilinniarfik Qeqqata Kommuniata Namminersorlutik Oqartussallu "Inuusuttunut suliffissaaleqisunut iliuusissatut pilersaarut" pillugu suleqatigiinnerisigut aningaasalersorneqarpoq.
