Maniitsumi aallaasersortoqarnera seqqulutsitsisoqarneralu innuttaasunut toqqissisimajunnaarsitsisoq

- Toqoraasoqarpa? Toqusoqarpa? Susoqarpa? Kamaattoqarpa? Kamaannermit aallaasersortoqarpa? Pinnguaannartoqarpa? Tamakku eqqarsaatit sarsuallutik.

Maniitsumi innuttaasut ilaata sapaatip ullaassaani qaarpallammik tupatsinneqarnermi kingorna taama eqqarsaatersorpoq.

Maniitsumimi arfininngornerummi ullaassaani illoqarfimmi aallaasersortoqarpoq, unnuarlu taama qaarpallattoqarmat innuttaasut ilaat aallaasersortoqaqqissoralugu tupassimaqaaq.

- Taava qitornara kisimeeqatigeriarakku qanoq iliuusissat nalunarsillutik. Iserniarsarilissappata qanoq iliussuunga? Meeraralu pingasunik ukiulik kisimiittoq ilagalugu. Taava uanga qanoq iliuuseqartariaqartussaavunga pingitsoornanga. Soorlu tamakkua eqqarsaatit toqqissisimannginnermit takkussuullutik, innuttaasut ilaat aalassassimaqisoq taama oqaluttuarpoq.

Taassuma kinaassutsini isertuuppaa, KNR-imilu nutaarsiassaqartitsiviup kinaanera ilisimavaat. Maniitsumi sapaatit akunneri arlallit matuma siorna aallaasersortoqarnerata kingunerisaanik oqallittoqangaatsiarsimammat taanna kinaassutsimik isertuusserusuppoq. Taassuma angerlarsimaffimminit aninissami toqqissisimanariunnaarsimallugu oqarpoq.

Aallaasersortoqarsimasoq politiit uppernarsarpaat

Maniitsumi arfininngornerup ullaassaani aallaasersortoqarsimasoq Kalaallit Nunaanni Politiini pingaartup Henrik Olesenip KNR-imut uppernarsarpaa. Nukappiaraq 18-iliineqanngitsoq silaannarmut marloriarluni igittarsimavoq, politiillu aallaammik arsaassimavaat.

Sapaatip ullaassaani politiit aamma nalunaarfigineqaqqipput. Innuttaasut ilaat politiinut saaffiginnittoq qaarpallattartumik illumi qanittuani tusagaqarsimavoq. Aallaasersornerunngitsorli politiit paasissutissiipput. Seqqortartumik qaartitsisoqarsimanera politiit sumiiffimmi misissuereerlutik inerniliipput, qaammaallattumik takunnissimasumik uppernarsaasoqarneranit. Imassakunik aallartinneqarsimasunik politiit nassanngillat, tigusarinninnatillu.

Angajoqqaat meeqqatit oqaaqqissaassagaat Maniitsumi eqqissiviilliortoqaqattaarnerata kingorna politiit kaammattuutigaat.

- Aatsaat taama pisoqanngilaq. Taamaammat angajoqqaat kaammattorusuppagut meeqqatik oqaloqatigissagaat. Imigassartorsimatilluni aallaasit pinnguarisassanngikkaat, Kalaallit Nunaanni politiini pigaartoq Henrik Olesen oqarpoq.

AAMMA ATUARUK Maniitsumi politiit aallaasersorfiusumut ornigukkasuartut

Aallaasit assigisaallu isumannaatsumut ilineqartarnissaat politiit angajoqqaanut aamma kaammattuutigaat. Aallaasit imassallu immikkoortillugit ingerlaannaq tingoriaannaajunnaarlugit toqqorneqartassasut.

Maniitsumi ulorianartorsiortitsisoqanngitsoq politiit aamma oqaatigaat. Inummilli aallaasilimik takusoqarpat, taannalu ulorianartorsiortitsippat politiit erngertumik sianerfigeqqullugit.

Apriilip arfernani aamma aallaasersortoqarpoq. Angut tassani tigusarineqarpoq, taanna igalaakkut igittarsimagami.