Maniitsormiut Nuummiittut Maniitsumi oqaluffitoqaq annaanniarpaat
![](/sites/default/files/styles/image_934x467/public/article_images/havnen_i_maniitsoq.jpg?itok=VrrVT5q0)
Maniitsumi oqaluffitoqaq 1864-imi sananeqartoq aserfallatsaalineqarnissaa anguniarlugu peqatigiffimmik Nuummi pilersitsisoqalerpoq.
Maniitsormiut Nuummi najugaqartut peqatigiiffimmik pilersitsinissamik suliniuteqarput, naatsorsutigineqarporlu peqatigiiffik marsip qaammataata ingerlanerani pilersinneqarumaartoq.
Ataatsimoorlutik suleqatigiipput
Maniitsormiut Nuummi najugaqartut februaarip qaammataata aallartisimalernerani katerisimaaneranni suliniuteqartut Angutinnguaq Heilmann aamma Dina Olsen nalunaaruteqarput peqatigiiffimmik pilersitsinissamik suliniuteqartoqartoq, Maniitsumi oqaluffitoqqap ataannarnissaanut aserfallatsaalineqarnissaannullu siunertaqartumik.
Oqaluffitoqaq kalkimik qallersorneqarsimasoq eriagisassanngortitaavoq, Qeqqata kommuneanillu nakkutigineqarpoq aserfallatsaalineqarneralu isumagineqarluni.
Oqaluffitoqqap napasuliartaata qisuttai aasimapput, peqatigiiffimmik pilersitsinissamik suliniuteqartut ilaat Angutinnguaq Heilmann oqarpoq.
Piumassusilippassuit
Maniitsumi oqaluffitoqaq pillugu peqatigiiffimmik Nuummi pilersitsisoqarpat, pilersaarutigineqarpoq aningaasaateqarfinnut qinnuteqartoqassasoq Maniitsumi oqaluffitoqqap aserfallatsaalineqarnissaanut atorneqartussanik.
Qarasaasiakkut attaveqatigiittarfimmi Facebook-imi nittartagaliortoqarpoq taaguuteqartumik " Oqaluffitoqaq projekt" tassani siunnersuutinik isummersuutinillu allattoqarsinnaalluni.