Piiaaffissaq Moriusamiittoq oqaloqatigiissutigineqartoq

 - Ilminitisiorfissatut akuersissutisiaqarfitsinniipput, piiarneqartussareerlutillu.

Dundas Titaniumimi pisortaq Hans Jensen Moriusami illut pillugit oqarpoq.

Qaanaap Kujataani nunaqarfiusimasumi Moriusami illukut aatsitassanik piiaasoqalissappat isaterneqarsinnaapput.

Avannaata Kommunia Moriusami arlalinnik illuuteqarpoq, borgmesterillu Palle Jerimiassenip (S) KNR-imut oqaatigaa, Dundas Titaniumimeersullu kommunip illuutai oqaluuserisimagitik. Kisianni taakkua piginneqatigiiffiup pisiarissanerai politikkikkut aalajangertoqanngilaq.

 - Illunik misissuisitsineq ingerlapparput. Kikkut pigineraat aamma qulaajaqqaartariaqaratsigu, illut piiannginnerani imaluunniit pisiaritinnginnerini. Taanna qulaajaqqaartariaqaratsigu suliaq suli ingerlavoq, Avannaata Kommuniani borgmesteri Palle Jerimiassen taama oqarpoq.

Dundas Titaniumip illut inuinnarnit pigineqartut aamma pisiarerusuppai,  ajornanngitsuinnaanngilarli:

- Tusarparput akilertingaatsiarusuttoqartoq, taamaaliornavianngilagulli. Akileerusuppugut, kisianni illup nalingata quleriaataanik, taannaluunniit sinnerlugu akiliuteqarusunngilagut, Hans Jensen oqarpoq.

Aatsitassarsiorfik piiaalissappat suliffeqarfinnik pilersitsisinissaa Palle Jerimiassenip neriuutigaa.

AAMMA ATUARUK Moriusami piiaanissamut pilersaarut ingerlalluartoq

Taamaammat qanimut suleqatigiinnissartik ataatsimiinnerminni isumaqatigiissutigaat.
Sulisinnaasullu Avannaata Kommunianeersut piginnaasaat naapertorlugit  sulisoqarnissaa kissaatigaa.

 - Isumaqatigaara, aamma isumaqarpunga inuiaqatigiinnut kommunitsinnullu iluaqutaassasoq aatsitassarsiorfimmik aallartitsisoqassappat.

Avannaata Kommuniani borgmesteri Palle Jerimiassen taama oqarpoq.

Kommuni Qaanaami inuttaasunik Moriusami aatsitassanik piiaanissamik pilersaarut pillugu septembarimi paasititsiniaassaaq.