Moriusami piiaanissamut pilersaarut ingerlalluartoq
Suliffeqarfiup ujarlernertik juunimi aallartissallugu Moriusallu eqqaani akuersissuteqarfigisami iluani nunap ilaa nutaaq pingaartumik samminiarlugu marlunngornermi nalunaarutigaa.
AAMMA ATUARUK McIllreep Avanersuarmi aatsitassarsiulernissaq naatsorsuutigaa
Ujarlerfik Iterlammik ateqarpoq, tamannalu ilmenitteqaqisoq paasinarsisimavoq. Sumiiffik piiaavissatut akuersissuteqarfiusoq 96 millionit tonsinik ilmenitteqarnissaa nalilerneqarpoq:
- Tamanna sivisunerusumik piiaanissamik isumaqarpoq.
Bluejay Miningsip nunatsinni piginneqatigiiffiutaani – Dundas Titaniumimi pisortaq, Hans Jensen taama oqarpoq.
Bluejay Mining aamma Dundas Titanium Moriusap Iterlaallu akornanni aasap manna ujarlernermi 40-t tikillugit sulisoqassapput.
80 milliuunit koruunit atorneqassasut
- Tamatumunnga 50 - 80 millionit koruunit akornanni ukioq manna atussavagut, Bluejayip suliassatai ilanngullugit.
Sulisut nunaqarfiusimasumi Moriusami annermik najugaqassapput.
Dundas Titaniumip aasaq manna ujarlereeruni alloriarneq tulleq tigussagaa, tassalu Namminersorlutik Oqartussanut piiaalernissamut akuersissummik qinnuteqassasoq, suliffeqarfiup pisortaata, Hans Jensenip naatsorsuutigaa.
- Taamaammat ukiup naannginnerani qinnuteqaasioreersimanissarput naatsorsuutigaarput.
Suliffeqarfiup assigiinngitsorpassuit suli aqqusaaqqaassagai Hans Jensenip erseqqissaatigaa, suulli tamarmik pilersaarutit malillugit ingerlappata piiaavik ukiut pingasut qaangiuppata piiaalersimassasoq nalilerpaa.
Suliffeqarfiup taamanikkussaq 175-inik sulisoqarnissaq pisarisaqartissavaa, taakkunannga amerlanerpaat immikkut ilisimasaqartut, sulisulli 35-nit 40-nut Avanersuarmeersuussapput.
Ilmenit qalipaammut qaqortumut akuutissatut titaniumiliornermullu atorneqartarpoq.