McIllreep Avanersuarmi aatsitassarsiulernissaq naatsorsuutigaa
Qaanaap kujataani Moriusap qanittuani saviminissamik titaniumitalimmik piiaanissaq ukiorpassuarni suliffissaqartitsissaaq, tamannalu avatangiisinut sunniuteqarpiassanngitsoq, aatsitassarsioqatigiiffimmi pisortaq isumaqarpoq.
Pinngortitaq pillugu nunarsuaq tamakkerlugu suliniaqatigiiffimmit, WWF-imit, umiarsuit assartortussat uumasunut ajornartorsiutaasinnaanerat ernumagalugu, misissoqqissaarneqarnissaa inassutigaat.
AAMMA ATUARUK Aatsitassarsioqatigiiffik misissuisitsiniartoq
- Aatsitassarsiorfiuvoq aningaasartuutikiffiusussaq. Iluanaaruteqarfiussaaq ukiullu 100-t tungaannut atasinnaassalluni. Avatangiisinut sunniuteqarpiassanngilaq Qaanaamilu sivisuumik suliffissaqartitsissaaq, tamannalu ukkataraarput, BlueJay Miningimi pisortaq Roderick McIllree oqarpoq.
Suliffeqarfik siuttuuffigisaa nunaqarfiusimasup Moriusap kangiani sissami aatsitassarsiornissamik akuersissutissarsinialeruttorpoq.
Ilmenitit 9 milliardit tonsit
Sioqqanimi tassani sukuluinnerpaat ilaannik, ilmenitimik taaneqartartumik, titaniumiliarineqartartunik saviminissaqaqaaq.
- Tamaani 9 milliardit tonsinik ilmeniteqartoq, GEUS-ip missingerpaa. Taakku tonsimut 300 dollarsit missaannik naleqarput, pisortaq oqarpoq.
Pinngortitaq pillugu nunarsuaq tamakkerlugu suliniaqatigiiffik, WWF, Namminersorlutik Oqartussat pineqartoq pillugu tusarniaaneranni peqataavoq.
Tassanngaanniillu siunnersortaaneq Mette Frost ima KNR-imut mailikkut allappoq:
AAMMA ATUARUK Pituffiup eqqaani aatsitassarsiornissaq 100-nik sulifissaqartitsisinnaavoq
- Uumasut najugannaavi pingaarutillit akornuserneqaqqunagit piffissaniluunniit uumasut sunnertiaffianni tamaani angallattoqaqqunagu, tamaani angallanneq sunniuteqassanersoq misissorneqartariaqarpoq. Taava imartani sunnertiasuni piffissaniluunniit uumasut sunnertiaffianni angalanissaq inerteqqutigineqarsinnaavoq, Mette Frost allappoq.
McIllree: Akuutissanik atuinavianngilagut
Avatangiisinulli sunniutaasinnaasut ilaatigut mikissangatillugit, aatsitassarsiornissap piviusunngornissaa, Roderick McIllreep naatsorsuutigaa.
- Tassami sioqqanik piiaaginnartusaavugut. Aatsitassarsiornissamut atortulersuutit angisuut atornavianngilagut, qaartiterisussaanngilagut, pujoralatsitsinavianngilagut, ujaqqanik aserorterinavianngilagut akuutissanillu atuinaviarata. Aatsitassap oqimaassusia atorlugu immikkoortiterineruvoq, BlueJay Miningimi pisortaq Roderick McIllree oqarpoq.
Suliffeqarfillu ilmenitimik maanna pisissussarsiorpoq, taamaalilluni akuersissummik tunineqariaruni aatsitassarsiorsinnaalerumalluni.
