ASSIT: Annanniuteqartoqaraluaruni ajunaartukinnerussagaluartoq

- Taamali oqartoqartarnera ilumuunngilaq, annanniutimmi tigusariaannaapput. Attallaarsuillu immami puttasinnaasussaat atorlugu annattoqarsinnavoq.

Taama oqariartuuteqarpoq Imarsiornermik ilinniarfik, Nuummi atuartunik Elevhjemmemi najugaqartunik imaani isumannaallisaaneq pillugu marlunngornermi pikkorissartitsimmata.

Atuartut 20-t missaanniittut Issittumi Sakkutooqarfiup umiarsuaani Vædderenimi imaani isumannaallisaaneq pillugu pikkorissartinneqarmata, Imarsiornermik Ilinniarfik siullermeerluni peqataavoq ikiuulluni.

Nuummi atuartut angerlarsimaffiat Elevhjemme nammineq angallateqarpoq taannalu angallatigalugu aallartarput, imaanilu isumannaallisaaneq pisariaqartinneqarluni.

AAMMA ATUARUK Inuit marluk Issittumi Sakkutooqarfimmit annaanneqartut

- Saaffiginninnitsinnut pissutaavoq uagut inuusuttuutigut ilagalugit umiatsiarluta pinialunnermut ilagisaratsigit,  taamaattumik pisariaqartissimavarput, isumannaallisaaneq pillugu misilittaanissarput, Karl Ole Petrussen, atuartut angerlarsimaffianni Elevhjemmemi pisortaq taama oqarpoq.

Umiarsuup Vædderenip helikopterinut inissinneqartarfiani paasissutissiisoqareermat, atuartut attallaanik annanniutinik atisipput Væddereniillu gummibådianik imaanut ninginneqarput.

Gummibådinit imaanut pissitussaapput  immamut nakkartuusaassallutik kingorna annanniummut pullattakkamut qaqisussaapput gummibådemullu naluttussaallutik.

Taama sungiusarneq Maratsi Arqip 15-nik ukiullip  ilikkagaqarfigilluarpaa.

- Nuanneq ilikkagaqarnaq,  annaassiniarneq aamma ilikkarpara kiisalu ikiuneq ikioqatigiinnerlu, Maratsi Arqe taama oqarpoq.

Annannniutit iluaqutaapput. 

- Attallaat puttasinnaasussiat atorlugit akunnerit 24-it immamiittoqarsinnaavoq kissassimaartoqarlunilu, annanniullu vesteq atorlugu akunnermik ataatsimik sivisutigisumik  immamiikkaanni annattoqarsinnaalluni,Thomas De Neergaard Imarsiornermik Ilinniarfimmeersoq taama oqaluttuarpoq.

Imarsiornermik ilinnarfimmit nalilerneqarpoq,  imaani ajunaartut siorna amerlanerat pinngitsoortinneqarsimasinnaagaluartoq, annanniummik vestemik atugaqartoqarsimasuuppat, 

Taamaattumik uagut oqariartuutigaarput,  angallammik ammaannartumik sukkasuuliamik angalagaanni immamut nakkarsinnaaneq piareersimaffigineqartariaqarpoq, Thomas De Neergaard oqarpoq.

AAMMA ATUARUK Angut sikkussaasimasoq annaanneqartoq

Tassa atuartut sungiusarnermi peqataasut immap qanoq nillertiginera malugaat,  attallaat annannitit sunniutaat paasivaat, angalaniaraannilu annanniutit pingaaruteqassusiat  paasillugu.

Pikkorissartitsinermi ilitsersuisup Peter Petersenip imarsiornermik ilinniarfimmeersup  pikkorissartitami angusai iluarisimaarpai.   - Ajunngilaq, ajunngitsorujussuupput pikkoreqaat, Peter Petersen  oqarpoq.

Pikkorissarneq naammassimmat peqataasut kissartunik kakaosortinneqarput boorlullu.