Ataasinngornikkut timmisartuussisarnerit januaarip naaneranut unitsinneqassasut
Danmarkimut Ataasinngornikkut timmisartuussisarnerit aappaagu januarip ulluisa 31-ata tungaanut unitsinneqarput, taamaalilluni Kalaallit Nunaata Danmarkillu akornanni sapaatit akunneranut pingasoriarluni timmisartuussisoqartalissaaq, tassalu marlunngornermi sisamanngornermi tallimanngornermilu.
Covid 19-ip tuniluunnerata kingunerissaanik Kalaallit Nunaannut angalasunut killilersuutit nutaat atuutilermata timmisartuussisarnerit ikilisinneqarput.
Angalasut ikinnerulernissaat timmisartuutileqatigiififmmit naatsorsuutigineqarmat, ukiuunerani timmisartuussisarnerit naleqqussarneqarnissaat pisariaqarsimavoq.
Kalaallit Nunaata Danmarkillu akornanni ataasinngornikkut timmisartuussinerit unitsinneqarnerinut attuumassuteqartut, Kalaallit Nunaata iluani timmisartuussisarnernut sunniuteqassasut, Air Greenland ilisimatitsivoq.
AAMMA ATUARUK Tamaat isigalugu: Coronavirus pillugu killiffik
Atuisut allannguuteqarnermit eqqugaasut angalanissamut allannguutit pillugit Air Greenlandimit nalunaarfigineqartassapput.
Angalanissamut pilersaarut naammaginanngippat angalanissamullu pilersaarummik nutaamik kissaateqaraanni, Air Greenland timmisartuutileqatigiiffiup nittartagaani immersuilluni attavigineqarsinnaavoq.
Danmarkip Kalaallit Nunaatalu akornanni juulleriartornerani ataasinngornikkut timmisartuussisoqartarumaartoq, Air Greenlandip aamma ilisimatitsissutigaa. 2020-mi ataasinngornermi decebarip ulluisa 21-anni ataasinngornermilu decembarip ulluisa 28-anni aamma 2021-mi ataasinngornermi januaarip ulluisa sisamaanni timmisartuussinerit taamaatinneqanngillat.
Angalanissamik aaqqissuussisumi assigisaaniluunniit bilitsisimasut taakkununnga saaffiginnissapput.