Siulersuisuni ilaasortanik toqqaanerit isertuaatsumik pinissaat Transparencyp piumasaraa
Naalakkersuisut oqartussat suliffeqarfiini siulersuisunut ilaasortanik nutaanik toqqaasarneranni tamassuma isertuaatsuusarnissaa pillugu oqallittoqaqqilerpoq.
Tamanna pivoq oqartussat suliffeqarfiini pingasuni immikkut ittumik ataatsimeersuartitsisoqarnissaanik Naalakkersuisut aalajangiinerisa kingorna.
Suliffeqarfinni Visit Greenlandimi aamma Illuut A/S-mi siulersuisunut ilaasortat arlallit taarserneqarput, Kalaallit Airportimi immikkut ittumik suli ataatsimeersuartoqarani.
| Siulittaasoq | Siul.tullia /Kukkunersiuisut siulitt. |
Ilaasortat |
|
| Royal Greenland | 500.000 | 300.000 | 200.000 |
| Kalaallit Airports | 750.000 | 300.000 | 200.000 |
| KNI | 350.000 | 175.000 | 125.000 |
| Air Greenland | 350.000 | 175.000 | 125.000 |
| Royal Arctic Line | 350.000 | 175.000 | 125.000 |
| Tele Greenland | 350.000 | 175.000 | 125.000 |
| INI | 350.000 | 175.000 | 125.000 |
| Greenland Holding | 350.000 | 175.000 | 125.000 |
| Sikuki Harbour | 350.000 | 175.000 | 125.000 |
| NunaOil | 150.000 | 75.000 | 50.000 |
| Greenland Oil Spill Respons | 150.000 | 75.000 | 50.000 |
| Visit Greenland | 150.000 | 75.000 | 50.000 |
| Nunatta Ammerivia | 150.000 | 75.000 | 50.000 |
| Illuut | 150.000 | 75.000 | 50.000 |
Siulersuisuni ilaasortat ukiumut aningaasarsiaat.
Najoqqutaq: Naalakkersuisut
Naalakkersuisullu inuiaqatigiinnit qinerneqartartuugaluartut, taamaattoq inuit kikkut siulersuisuunut ilaasortaasassanersut inuiaqatigiit ilisimatinneqarneq ajorput. Oqartussat suliffeqarfiisa siulersuisuini ilaasortat ukiumut 50.000 koruunit 750.000 koruunillu akornanni akissarsiaqarput.
AAMMA ATUARUK Siulersuisut toqqarneqarnerannut tunngavilersuutit Transparencymit paaserusunneqarput
Naalakkersuisut siulersuisuunernut toqqaasarnerat isertuaatsuusariaqartoq Transparency International Greenlandimi (TGI-mi) siulittaasoq, Anita Hoffer isumaqarpoq, isertuaatsuunngippammi toqqaasarnerit pissusissamissut ingerlanneqartannginnerannik isumaliulersitsisinnaasoq oqarluni:
- Qanoq iliuutsit tamarmik aamma siulersuisunut ilaasortanik toqqaasarnerit ersarissuusariaqarput, taamaaliornikkut atorfinni ileqqorlunnerit kammalaatersornerillu pinaveersaartinneqartassagaluarmata, Anita Hoffer oqarpoq imalu nangilluni:
- Siulersuisunut sooq ilaasortanngortinneqarnersut inuiaqatigiinnit paaseqqissaarneqartariaqarpoq aamma ilaasortaajunnaarsinneqarnermi suut tunngavilersuutaanersut paasiteqqissaarneqartariaqarluni, Anita Hoffer oqarpoq.
Piginnaaneqarnermut allattorsimaffiit aamma soqutigisanik aporaaatsitsisuunnginnissaq
Siulersuisunut toqqaasarnerit isertuaatsuunissaat pillugu suliniaqatigiiffik Transparency Greenland 2012-imili ujartuivoq, tamannarpiarlu pillugu 2019-imi nalunaarusiorpoq, toqqaasarnerit qanoq isertuaatsuunissaannik arlalinnik innersuussaqarlutik.
Innersuussutaannut ilaapput, ingerlatsiviit ataasiakkaat siulersuisuinut ilaasortat qanoq piginnaaneqarnerinut allattorsimaffiit kikkunnillu tamanit atuagassaanissaasa ineriartortinneqarnissaat ujartorlugu.
Assersuutigalugu avammut nalunaaruteqartarnernut pikkorissoq imaluunniit inatsisilerituutut ilinniarsimasoq siulersuisut pisariaqartikkaat.
- Ilaasortassaq toqqarneqarpat takuneqarsinnaassaaq, ilumut taassuma piginnaasai pissutigalugit ilaasortanngortinneqartoq aamma siulersuisunut iluaqusiisinnaanera pillugu toqqarneqartoq atuarneqarsinnaassalluni, Anita Hoffer oqarpoq.
Transparencymi siulittaasoq aamma isumaqarpoq, ilaasortassatut toqqarneqartut tamarmik ilisersuummik tunineqartariaqartut, soqutigisaat qanoq iliorluni aporaattoornaveersaartinnissaat atuarsinnaaniassammassuk.
Naak Transparency 2012-imili isertuaatsuusarnissamik ujartuigaluatoq tamanna iluamik kinguneqarsimanngilaq.
- Isertuaatsumik pisoqartarnissaa politikerit namminneerlutik aalajangigassaraat, kisianni qinersisartut tamanna aamma aalajangiiffigeqataasinnaavaat qinersinerni politikerinik allannguerusuttunik taasinikkut, Transparency International Greenlandimi (TGI-mi) siulittaasoq, Anita Hoffer oqarpoq.
Transparencyp isummersuutai pillugit Naalakkersuisut siulittaasuat, Kim Kielsen KNR-imit oqaaseqartinniaraluarparput apersoerneqarnissanili taassuma kissaatiginngilaa.
