Illuatungiliuttut kigutinik narlorsaasoqartarunnaarnera mamiatsaatigigaat
Meeqqat kigutaannik narlorsaasoqartarunnaassasoq Naalakkersuisut aalajangerput, tamannalu illuatungiliuttunit mamiatsaatigineqaqaaq.
Meeqqat kigutaat piffissaagallartillugu narlorsarneqartannginnerisa inuiaqatigiinnut siunissami kingunipiloqarsinnaanera, Inuit Ataqatigiit (IA) peqqissutsimut tunngasunik oqaaseqartartuata, Stine Egedep, aarleqqutigaa.
- Allatut aalajangiisoqanngippat kigutinik ukiuni pingasuni nalorsaasoqartarunnaarnera siunissami aningaasartuutaassaqaaq, Stine Egede tusagassiorfinnut nalunaarummini allappoq.
Inuit Ataqatigiit peqqissutsimut naalakkersuisunngorlaaq, Anna Wangenheim, allatut aalajangiinissaanut kaammattorpaat.
- Naalakkersuisunngorlaaq Anna Wangenheim isumalluarfigalutit sulilluarnissannik kissaappatsigit, Stine Egede allappoq.
AAMMA ATUARUK Naalakkersuisoq: Meeqqat kigutaannut narlorsaatit akisuallaaqaat
Ilaqutariit akissallit qitornamik kigutaasa kigutileriffinni namminersortuni nalorsartinnissaannut kisimik akissaqassappata tamanna eqqortuunngitsoq, IA isumaqarpoq.
Suleqatigiissitsisut: Tunngaviusumik inatsisissaq pillugu isumalioqatigiissitaq aningaasanik aallerfiuli
Nunatsinni tamarmi meeqqat kigutaannik narlorsaasarneq atuutilersinneqaraluarpat, tamanna ukiumut 15 millioniniit 20 millionit koruunit tungaannut akeqassaaq. Tamannalu akisuallaartoq, Naalakkersuisut isumaqarput.
Tamatumunngali aningaasaliissutissarsiortoqartariaqartoq, illuatungeriit isumaqarput.
Tunngaviusumik inatsisissaq pillugu isumalioqatigiissitaq atorunnaarsinneqarlunilu tassunga aningaasaliissutaasartut kigutinik narlorsaasarnermut atorneqassasut, Suleqatigiissitsisut siunnersuutigaat. Taamaaliorneq 2020-mi 5,5 millionit koruuninik 2021-milu 2,3 millionit koruuninik pissarsiaqaataasinnaavoq, aningaasalli taakku kigutinik narlorsaanermut aningaasartuutinut tamakkiisumik matussusiissutigineqarsinnaanatik.
AAMMA ATUARUK Naalakkersuisut Nuummi kigutinik narlorsaasarnerit unitsikkaat
Kigutit nakorsaannik immikkut ilinniagalinnik soraarnernik nunanit allaneersunik nunatsinnut suliartortitsisoqarsinnaanngussasoq, Suleqatigiissitsisut ilaatigut aamma siunnersuutigaat. Namminersorlutik Oqartussallu kigutit nakorsanngorlaanut - assersuutigalugu ilinniakkamik naggataani - nunatsinnut aasakkut suliartornissaannut pilerisaarisariaqartut, aamma isumaqarput.
Partii Naleqqallu meeqqat kigutaannik narlorsaasarneq aningaasanut inatsimmut ilanngutiteqqinneqartariaqarsoraa.
- Naalakkersuisut meeqqat kigutaannik narlorsaasarnermik neqerooruteqarnermut aningaasaleerusunnginnerat paasisinnaanatigulu akuersaarsinnaanngilarput, Parti Naleraq allappoq.
Kigutinilli narlorsaasarnermut aningaasanik suminngaanniit aallertoqarsinnnaaneranik IA Partii Nalerarlu siunnersuuteqanngillat.
Atassut: Namminiilivinniarpallaarnerup peqqinnissaqarfik innarlerpaa
Atassut mamiatsannerpaavoq.
Kigutinimmi nalorsaasaasoqartarunnaarnera kisiat aarlerinarani peqqinnissaqarfilli tamarmi, amigartumik aningaasalersorneqartoq, aamma aarlerinartorsiortinneqartoq, Bentiaraq Ottosen Atassummeersoq isumaqarpoq.
- Oqartoqarsinnaavoq kalaalinngorsaavallaarnerup qinersisartunillu iluareqqusaarnerup piliaasa annersarigunaraat, allaat immitsinnut artukkerluta Naalakkersuisoqarfimmik ullumikkut aningaasartuuteqarfigiinnakkatsinnik ingerlataqarneq akilersinnaangitsutut ingerlatsinerusoq takusinnaalluarparput, Bentiaraq Ottosen tusagassiorfinnut nalunaarummini allappoq.
AAMMA ATUARUK Bøjlilertinnissamut misissuinerit sukateriffigineqartut
Peqqinnissaqarfimmi suliassat nunatta 1992-imi akisussaaffigilerpai. Peqqinnissaqarfik taamani aamma illoqarfinni nunaqarfinnilu isorliunerusuni sulisussaaleqinngitsoq, Bentiaraq Ottosen isumaqarpoq.
Taamaammat nunatsinni peqqinnissaqarfik danskit naalagaaffiata akisussaaffigileqqittariaqaraa, Atassut isumaqarpoq.
- Peqqinnissaqarfitsinnik oqartussaaffeqarnerput nalilersoqqittariaqalerparput, Bentiaraq Ottosen allappoq.