Coronaqarnerani ikiorsiinerit: Aningaasaateqarfik Danmarkimi ilaqutarsianut tapersiissuteqartoq
Ilaqutariit kalaallinut Danmarkimi ilinniartunut attaveqaataasut coronap ajornartorsiortitsinerani illuminni aningaasartuuteqarnerupput.
Ilaqutariit attaveqaataasut amerlasuut Danmarkimi atuarfeqarfiit tamarmik matoqqaneranni atuartunik piffissaq tamakkerlugu najugaqartitsigallarput.
Taamaammat Kalaallit Illuutaat ilaqutariinnut attaveqaataasunut aningaasatigut ikiorsiissuteqarnissamut aningaasaateqarfimmut Oak Foundation Denmarkimut qinnuteqaateqarput.
AAMMA ATUARUK Tamaat isigalugu: Coronavirus pillugu killiffik
Tamannalu aningaasaateqarfiup aningasanik, pinasuartunut atugassatut immikkoortitaminit, tunissuteqarneranik kinguneqarpoq. Oak Foundation Denmarkip pisortaa, Esther Nørregaard-Nielsen oqarpoq.
- Inummut allamut angerlarsimaffimmik ammaassineq pilliuteqarnerungaatsiarpoq, aammali ilaqutariinnut akuliuffiuneroqaluni. Namminerlu ulluinnarisat allaanerulersimatillugit sivitsortumi taamaaliorneq kakkaginartorujussuuvoq.
- Taamaammat ilaqutariit inuusuttunut najugaqartitsiinnarsinnaaqqullugit aningaasatigut tapersiisinnaalluta oqarpugut. Taamaaliorusoqaagut, Esther Nørregard-Nielsen oqarpoq.
Kalaallit Illuutaat aningaasanik aqutsissaaq
Aningaasaateqarfik qanoq amerlatigisumik Kalaallit Illuutaannut aningaasaliisimanersoq pisortap paasissutissiissutigerusunngilaa.
Kalaallit Illuutaasa kikkut pisariaqartitsinerpaanerat aalajangertussaavaa. Kisiannili:
- Paasissutissiissutigineqartorli tassaavoq ilaqutariinnut pisariaqartitsisut 2000 koruuniussaaq, Esther Nørregard-Nielsen oqarpoq.
Ilaqutarsiaasut 50-it tapiissutisiumallutik maannamut saaffiginnereertut, Aalborgimi Kalaallit Illuat paasissutissiivoq.
Aningaasat ataasiartaapput, Danmarkimili atuarfeqarfiit piffissami sivisunerusumi matoqqatiinnarneqassappata aningaasaateqarfiup Kalaallit Illuutaat oqaloqatigiumaaraa, Esther Nørregård-Nielsen paasissutissiivoq.