Mamakujuttut sodavandillu atuarfimmi inerteqqutaalissapput
Kommuneqarfik Sermersuumi atuarfiit pillugit immikkoortoqarfik atuarfinnilu siulersuisut eqqartorpaat atuarfinnut mamakujuttut sodavandillu eqqunnissaasa inerteqqutaalernissaat qanoq kinguneqarumaarnersoq.
- Taamatut inerteqquteqalerneq maajip naanerani atuutilissaaq, atuarfeqarnermut Kommuneqarfik Sermersuumi pisortaq Hans Peter Broberg taama KNRimut oqarpoq.
- Ajoraluartumik takussaavallaarpoq atuarfinni mamakujuttutorlunilu sodavanditortarneq, tamannalu atuartitsinermut ajortumik sunniuttarpoq, Hans Peter Brobergip oqaatsini ilavai.
Taassuma oqaatigaa mamakujuttutorneq sodavanditornerlu pissutigalugit sukkumik annertuallaamik timimiittoqalersillugu meeqqat aallaamalersartut atuarnermi tamakkiisumik malinnaasinnaajunnaarlutik.
- Soorunami tamanna meeqqat ilikkagaqarniarnerannik killiliisarpoq, Hans Peter Broberg oqarpoq.
- Maanna atuarfinni siulersuisullu eqqartorparput unioqqutitsineq qanoq kinguneqartittassanersoq aammalu inerteqqut qanoq iliorluni atuutsinniarneqassanersoq, Hans Peter Broberg oqarpoq.