Malik Berthelsenip naartuersinneq akeqalersikkusuppaa
Naartuersittartut ikilisarneqarnissaannik Naalakkersuisut pilersaaruteqarnersut paaserusullugu § 36 naapertorlugu taanna apeqqutilliivoq.
Naartuersittartut qaammammut 70-it 75-illu akornanniittut peqqissaaveqarfinnut aningaasartuuterpassuarnik kinguneqartassapput pingaartumik nappaatit katsorsartariaqartut ukiut tamaasa amerliartortillugit aamma naartunaveersaatit akeqanngitsut taama amerlatigitillugit naartuersittartorpassuaqarnera pissusissamisuunnginnerarpaa.
- Aqqusinikkut biilinik angallannermi sukaterisoqarneratigut biilertartut amerlanerpaat qitequtaasaqartalerput, qitequtaasaq inunnit amerlasuunit ajutoorsinnaanermik illersuutitut atornagu, kisianni akiliisitaanissartik pinngitsoortinniarlugu taamaasiortarput, Malik Berthelsen aperinerminut atatillugu allappoq.
Piaarinaatsoorlutik naartulersoortartut akiliisitaanissaq pinngitsoorniarlugu mianersornerulernissaat ilimagilluinnarpaa. Naartuersittartummi 900-t piaarinaatsoornerinnakkut naartulersoortarsimanavianngillat, Siumumeersoq Malik Berthelsen naggasiivoq.
