Malik Berthelsen: Aqqutissiuussisut tamarmik naapitittariaqarput

Meeqqat atuarfiini aqqutissiuussisut Qallunaat Nunaanni Efterskolet Kattuffiannit siunnersuinerlunnerarlugit uparuarneqarnerinut atatillugu Malik Berthelsen ima oqarpoq:

-Meeqqat atuarfianni angajullernut siunnersuisartut piffissamik annikitsuararsuarmik siunnersuinissamut atugassaqartitaapput. Atuartullu amerlassusaat eqqarsaatigalugu siunnersuisuunissamut immikkoortinneqartartut ullormut 2 tiimit naammanngillat. Isumaqarpugut atuartut siunissami sunissaannut siunnersorneqarnissaannut piffissaq annerusariaqartoq, oqarpoq.

Taamaattumik aamma ajornartorsiutip tamarmiusup siunnersuisartunut tutsinneqarnissaa illuatungiliuttut isumaqatiginngilaat.

Malik Berthelsen ilinniartitaaneq pillugu naalakkersuisunut illuatungiliuttut Siumut sinnerlugu oqaaseqartartoq taama ilisimatitsivoq.

Ilinniartitaaneq pillugu Inatsisartuni ataatsimiititaliami siulittaasup Harald Biancop aqqutissiuussisut tiguinnagaagajuttarneri siornatigut ilinniartitsisutut sulinermini nalunngilaa.

-Soorunami ajuusaarnarpoq taamaattoqarnera, nunatsinni ilinniartitsisutut ilinniartitaaneq aallaavigalugu sammivinnut naleqqussaanermi ilinniartitsisoqarneq ajorpoq. Taamaalilluni assersuutigalugu anginernut siunnersorti tiguinnagaasinnaasarpoq, siunnersorneqatarneq ilaatigut amigarsinnaasarluni, Harald Bianco oqarpoq.

Meqqat atuarfiini annerni atuarfimmit anigunik sunissaannik aqqutissiuussisut nunatsinni tamarmeersut naapittariaqartut Malik Berthelsen isumaqarpoq.

- Ukiumut aningaasat 7-10 millionit efterskolenut atortarutsigit taava taakkunannga siunnersuineq pitsaanerulertinniarutsigu aqqutissiuussisut tamarmik naapittariaqarput.

Efterskolernissamut ilitsersuut videoliaq Danmarkimi Efterskolet Kattuffiata DVD-inngortinneqarnissaannut aningaaliissutissat amigaatigisaat 400.000 koruuniusut naalakkersuisunit tapiiffigineqarnissaat illuatungeriit tapersersorpaat.