Malik Berthelsen: Aningaasanik aqutsineq atuartitsissutaalerli

Nunatsinni inuit amerlaqisut namminneq aningaasaatimik aqunnissaat ajornartorsiutigisarpaat. Ullup akissarsiffiup kingornagut ullut marlussuinnaat qaangiukkaangata kontot imaarsimasarput.
juulip 27-at 2010 05:04

Inatsisartuni ilaasortaq Malik Berthelsen (S) Naalakkersuisunut paragraf 16 najoqqutaralugu apeqquteqarnermini taama allappoq, tamatumani siunnersuutigalugu aningaasanik tunngaviusumik aqutsisinnaaneq meeqqat atuarfianni atuartunut angajullernut ilinniartitsissutigineqartariaqartoq.

Ilaqutariit amerlaqisut inuuniarnermikkut atugaat pitsaanngitsut, nammineq aningaasaatit qanoq aqunnissaannik, qanorlu missingersuusiortarnermik, ilisimasaqannginnermik pissuteqartut, Malik Berthelsen isumaqarpoq.

Eqqarsaatigeqqaagaanngitsumik aningaasanik atuineq assorsuaq ersippoq, ilaatigut soorlu akissarsisoqarnerani, pensionisisoqarnerani akileraarutinillu utertoornermi, Malik Berthelsen allappoq, isumaqarlunili innuttaasut inersimasut aningaasanik atuinerisa allanngortinnissaat kingoqqutseriissagunartoq.

- Kinguaariit tullii aningaasanik aqutsinissamut pikkorinnerulissappata, taava atuarfik tamatuminnga aallartitseqataasariaqarpoq.

- Inersimasunngunnginnerminni akissarsiamik ajunngitsumik pitsaanngitsumillu aqunnerisa kingunissaat ilikkareertariaqarpaat, Malik Berthelsen allappoq, neriuutigalugulu Naalakkersuisut aningaasanik aqutsinerup meeqqat atuarfianni atuartunut angajullernut fagitut nutaatut isumassarsiaq qimerloorumaaraat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq