Maliina: Naalakkersuisut ajornartorsiuteqarput
Naalakkersuisut siuliisa aningaasaqarnermut politikkertik atuutilernerminnit ukiut pingasut qaangiuttut, tassalu ukiakkut 2012-imi saqqummiukkaat, aamma Vittus Qujaukitsup innersuussutigaa.
Kisianni taassuma naalakkersuisutut siuliata, Inuit Ataqatigiinneersup Maliina Abelsenip, Vitus Qujaukitsup taama nalunaaruteqarnera paasiuminaatsippaa:
- Politikkitsinnik ingerlateqqiinerarlugit oqarnera pillugu piffissani atorlugu tusagassiutinut allammat eqqarsaallannaqaaq. Isumaqarnangajapporluunniit, ajornartorsiorsimaruttorami piffissaajarluni taama allaat allattariaqalersimasoq, Maliina Abelsen oqarpoq.
Kisianni Vittus Qujaukitsup Nunatta karsianik aqutsineq tigugamiulli KNR-imut erseqqissartarpaa, Nunatta Karsia amigartooruteqaraluarpat ajornartorsiutissartaqanngitsutut isigigamiuk. Aamma Akileraartarneq atugarissaarnerlu pillugit Isumalioqatigiissitap suliai Siumup isornartoqarteqai, pissaanerli tigugamikkuli nipi allaaneq saqqummiuttalerpaat.
Vittus Qujaukitsoq maanna ima nalunaarpoq:
- Naalakkersuisut siusinnerusukkut oqaatigereerpaat, Naalakkersuisut Akileraartarnermut Atugarissaarnermullu Ataatsimiititaliarsuup angusai akuerineqartut, kisianni tamanna imaanngilaq, Naalakkersuisut ataatsimiititaliarsuup inassuteqaatai tamaasa malillugit naammassiniaraat. Naalakkersuisut siullermik inassuteqaatit peqqissaartumik misissussavaat tamatumalu kingorna inassuteqaatit politikkikkut piviusunngortinneqarsinnaanersut isummerfigissallugit, aningaasaqarnermut naalakkersuisoq nassuiaavoq nangillunilu.
- Naalakkersuisut aningaasaqarnikkut politikkianni titarnerit siulliit takuneqarsinnaalissapput ukiumoortumik Aningaasaqarnikkut Ingerlatsineq pillugu Nalunaarutip saqqummiunneqarneranut atasumik, nalunaarummilu tassani siunissami aningaasarsiornikkut suliassat pingaaruteqartussat qulaajarneqassapput kiisalu 2014-imut aningaasaqarnermut inatsisissatut siunnersuummi takuneqarsinnaassaallutik. Taakkua aggustimi 2013-imi tamanut saqqummiunneqassapput, aningaasaqarnermut naalakkersuisoq allappoq.
Naalakkersuisut politikkiminnik nalunaarumaataarnerat, siulittaasup Aleqa Hammondip illersorlugu oqarnikuuvoq, aningaasanut inatsit maanna atuuttoq tunngavigalugu sulillutik taavalu Naalakkersuisunngornerminni piffissaqartariaqarlutik.
Maliina Abelsenili isumaqarpoq, qanoq politikkeqarnissamut nalunaaruteqartannginnermut tamakkua utoqqatsissutissaanngitsut.
- Qanoq politikkeqarnissamik siunertaqarneq oqaluttuarineqakutsoorsinnaavoq. Aamma ingerlatsinermut sanaartornermilu aningaasaliissutit oqimaaqatigiiffigissaannik
siunissami aningaasanut inatsisiliornissaq siunertarinerlugu oqaluttuarineqakutsoorsinnaavoq. Aammami naatsorsuutigineqartariaqarpoq Naalakkersuisut siunissamut takorluugaqartut, Maliina Abelsen oqarpoq.
Naalakkersuisulli annikilliuuteqarnerannut aningaasaqarnermut naalakkersuisuusimasoq paasinnissinnaassuseqarpoq, naalakkersuisuulersulli piareersarsimalluarsimasinnaanerannik ilimasuinnani:
- Soorunami inissittornissamut piffissaq atorneqartariaqarpoq aamma suliat peqqissaarunneqartariaqarput, tupaallaatigaarali, naalakkersuisutut inissitsitinnginerminni pissutsit missorsimarpasinngimmatigit. Aamma ilimagineqarsinnaasariaqaraluarpoq, Akileraartarnermut Atugarissaarnermullu Isumalioqatigiissitap suliai, aningaasaqarnermut siunnersuisooqatigiit ukiut siuliini suliaat allallu pillugit nunatsinni politikerit paasisimasaqarnerussasut. Isumakulunnalaarpormi, aatsaat massakkut atuarnialissappata, qanorlu politikkeqarniarnerminnik ukiup affaa qaangiuppat aatsaat nalunaarlutik.
