Maliina: Ajornartorsiortut Danmarkimut nuuttassanngillat

Ajornartorsiortut Danmarkimut nuunnginnerini nunatsinni ajornartorsiut aaqqitassaraarput.

- Uagut nunatsinniittugut sammissagipput qularutissaanngilaq, neriuutigaarpullu kalaallit Danmarkimiittut immikkut isumagineqarnissaat, kisianni imaanngilaq Naalakkersuisut Danmarkiliarlutik kalaallinut Danmarkimiittunut suliaqariartussasut, Maliina Abelsen oqarpoq.

Taarsiulluguli kalaallit ajornartorsiortut Kalaallit Nunaanniit aallartarnissaat pinaveersaartinniarpaa.

- Danmarkiliartarnermut pinaveersaartitsinissarput pikkoriffiginerulertariaqarparput, nalunngikkutsigumi inuit ajornartorsiortut Danmarkiliaraangamik atugarisaat ajornerulertartut, taava amerlanerpaat maaniitsinniartassavagut, Maliina Abelsen kaammattuivoq.

Taamaattumik suliaq maani suliarineqassaaq.

- Danmarkiliaraangamik ajunnginnermik inuuneqalerneq ajorput, taamaattumik maani ajornartorsiut aaqqinniartariaqarparput. Aliasuutit suliarinissaat, kinguaassiutitigut atornerluisarnerit allallu ajornartorsiutaasinnaasut samminerisigut, Maliina Abelsen oqarpoq nangillunilu:

- Isumaginniaartarnissaq sammisarisorujussuuvarput, meeqqat inuusuttullu eqqarsaatigalugit aammali ilaqutariinnut sullissivinni ilaqutariillu ornittagaanni isumaginniaartarnermi, taamalillunilu pinaveersaartitsineq, uanga isumaga malillugu, pingaaruteqarnerpaavoq.

Isumaqanngilarli isumaginninneq Danmarkimi pissasoq. Danmarkimi isumaginninneq Folketingimi ilaasortat suliassaraat. Naalakkersuisuunngitsoq, kisianni danskini suleqatitsinni tamanna eqqartorneqarsinnaavoq.

- Kalaallillu Danmarkimiittut ajornartorsiutillit ornittagaasa naalagaaffiup aningaasalersuinnassagaat suleqatima Juliane Henningsenip Folketingimi sulissutigisimagaa nalunngilara, Isumaginninnermut Naalakkersuisoq Maliina Abelsen oqarpoq.