Maliina Abelsen: Meeqqat sullinneqarnerat assigiiaarnerusariaqarpoq
- Meeraq aallaaviginiarsiuk, meeqqap angajoqqaani najorusukkunigit soorunami piumasani pissavaa. Taama Maliina Abelsen ippassaanikkunni MIPI´p pineqaatissinneqarsimasut qitornaasa amerlassusaanik misissuisimanerat tusarliunneqareersorlu oqaaseqarpoq.
Meerarli imaasiallaannaq isumasiorneqarsinnaanngilaq. Inatsisartuni ilaasortap Demokratineersup Anda Uldumip meeqqanut ombudsmandimik atorfinitsitsisoqarnissaa siunnersuutigisimavaa, Maliina Abelsenilli isumaqataaffigivallaanngilaa.
- Meeqqanut tunngassutilinnut tamakkiisumik aalajangersimasumik sullisseriaaseqalernissaq kaammattuutigaara, inuit ilaat oqartarput meeraq aatsaat 12-nik ukioqaleraangat isumasiorneqarsinnaalersartoq, imaattariaqanngilarmi meeraaraq uukapaasiaralugu nammineq isumarinngisaminik isummersortinniarneqassasoq, Maliina Abelsen oqarpoq.
Aalajangersimasunik suleriaaseqarnissaq aamma pisariaqarnerarpaa.
- Unalumi suliassaq aalluterusuppara, aappaagumullu siunnersuummik suliarilluakkamik inatsisartunut saqqummiininnik kinguneqartikkusullugu.
Amigaatigisarami unaavoq Susassareqatigiit suleqatigiinnerulernissaat, tassa kommunit, inunnik sullissiviit, naalakkersuisut, ilami susassareqatigiit suugaluilluunniit akornanni suleqatigiinnerulernissaq ujartugaraara, taamaalillutimmi meeqqanut inuusuttuaqqanullu ataatsimoorussaminnik kimilimmillu siunnersuusiorfigisinnaanngorniassammatigut, Maliina Abelsen oqarpoq.