Maliina Abelsen: Meeqqat inuusuttullu sullisissavakka

Meeqqat inuusuttullu pillugit suliniuteqartuunera isertuunneqarsinnaanngilaq, taakkulu immikkut samminissaat eqqarsaatigaara, taama oqarpoq Maliina Abelsen (IA), ilaqutariinnermut naalakkersuisunngortussatut innersuunneqartoq.
Allattoq Jaaku Lyberth
juunip 10-at 2009 14:01

Ilaqutariinermut naalakkersuisunngoruit innuttaasut tamanna qanoq malugissavaat?

- Ukiuni sisamani tullittuni suliniutissagut erseqqissut piareersimatippagut.

Ilaqutariinnermut naalakkersuisoqarfimmi naalakkersuisuuneq akissussaaffiuvoq annertooq. Aamma meeqqat inuusuttullu pillugit suliniutigineqartussat saniatigut suliassat allat piaartumik misissussavagut, Maliina Abelsen oqarpoq.

Akileraarutit aammalu atugarissaarneq pillugu ataatsimiititaliarsuarmik pilersitsinissaq qineqqusaarnerup nalaani Inuit Ataqatigiinnit saqqummiunneqarpoq.

- Ataatsimiititaliat taakkua uanga naalakkersuisoqarfinni inissisimassanngillat, taamakkaluartoq naalakkersuisoqarfiit assigiinngitsut akimorlugit suliassat ingerlanneqassapput.

Maliina Abelsen isumaqarpoq kattuffiit peqatigiiffiit suliniaqatigiiffiillu ikiortiserissalugit pingaaruteqartoq.

- Ilaqutariinnermut isumaginninnikkullu politikkikkut anguniakkat inuiaqatigiinnit tapersersorneqarnissaat pisariaqarpoq. Kikkut tamarmik ajunngitsumik atugaqarnissaat pillugu suliuniuteqartuuvunga tamannalu polikkikkut sulerusussuseqarninnut aallaaviuvoq, tamannalu ilinniagaqarninnit siornatigullu atorfiginikuussannit ilikkarpara, ilaqutariinnermut naalakkersuisunngortussaq Maliina Abelsen oqarpoq.

Maliina Abelsen naalakkersuinermik suliaqarnini sioqqullugu Meeqqat Inuusuttullu pillugit ilisimasaqarfimmi ataqatigiissaarisutut sulivoq. Maliina Abelsen inooqatigiit pissusiinik, tassalu Sociologimi, ilisimatusarsimavoq, taamatullu politikki inunnillu isumaginninneq pillugu qaffasissumik ilinniarsimalluni.