Maligassiuisut Showimi nersornaasiisoqarpoq - nersornaaserneqartullu aaku
Sisoraaserluni ooqattaasartartoq Ukaleq Slettemark timersullammattut pikkorivissunilu takutitsilluarnerpaatut nersornaatisivoq.
Soorunami ukiuunerani OL-qarnerani Beijingimi peqataanera maluginiarneqarluarpoq. Peqataaginnaranimi ooqattaasarnermi eqqoriakkat 30-usut tamakkerlugit eqqorpai peqataasuni kisiartaalluni. Tamanna aamma nunani tamalaani tusagassiutini maluginiarneqarluarpoq.
Aappassaa pikkorivissuni takutitsilluarnerpaatut Ukaleq Slettemark nersornaaserneqarpoq. Siullerpaamik 2019-mi taamatut nersornaatisivoq inuusuttuaqqani nunarsuarmi pissartanngorami.
Nersornaat nutaaq
Nersornaat Aalasa Maligassiuisup Showip ukiuni arfinilinni ingerlanerani siullerpaamik tunniunneqarpoq. Tassani nersorniarneqarput timimik aalatitsinerulernissamik suliniuteqarluartut Kalaallit Nunaanni timersoqatigiit kattuffiata GIFip 2030-mi timimik aalatitsinerpaanngornissamik anguniagaa tunaartaralugu.
Jan Erik Pedersen suliniummit gå-væk-kræftimeersoq siullersaalluni tassannga nersornaaserneqarpoq.
Jan Erik Pedersen pisuttuartitsinikkut nappaassuarmik kræftimik akiuiniartuuvoq suliniut pitsaaliuinertut aaqqissuuttarlugu.
Sungiusaallammattut nersornaammik tunineqartoq tassaavoq Jens Thorin Uummannami timersoqatigiiffimmi UB-68-mi futsalimi sungiusaalluartarnini pillugu avannaani illoqarfigisamini meeqqanut inuusuttunullu suliniarnini pillugu nersornaatisilluni.
Taamatuttaarlu suliniarnermut tunniusimalluartumut aqutsisuullammammut nersornaat tunniunneqarpoq. Taamatut nersornaatisisoq tassaavoq Line Poulsen Nuuk Gymnastikkimeersoq. Taannalu ukioqqortussutsini arlalinni peqatigiiffiup suliniarnerani siuttuuvoq.
Nersorinnikkumasoqartoq
Kalaallit Nunaanni sisorartartut kattuffiat Maligassiuisut showip nalaani oqaaseqarumavoq – pisorlu isiginnaartut tussunngussutigigaat malunnarpoq.
Tassungami tunngaviuvoq sisoraatinik oqilaniuttarnermi Nunatsinni ataqqineqarluartut ilaat Hans Rafaelsen nappaammit katsorsarneqarsinnaanngitsumik eqqugaammat. Qujassuteqarlunilu oqalugiaat malunnartumik attortisimasumit Berhard Olsenimit Sisorartartut kattuffianneersumit saqqummiunneqarpoq. Taassuma eqqartorpaa Hans Rafaelsenip nuliatalu Karen Mina Clasenip sisoraatinik oqilaniuttarnerup Nunatsinni ineriartorneranut malunniutilimmik sunniuteqarsimanerat.
Timersornermilu ineriartortitsisunik allanik nersornaasiisoqarpoq.
Timersortartunik ineriartortitsilluartunut Elite Sport Greenlandip nersornaataa Nagdlúnguup Ilulissaneersup meeqqanik inuusuttuaqqanillu sullissilluarnera tunngavigalugu peqatigiiffimmut tassunga tunniunneqarpoq.
Aammattaaq meerarpassuit inuusutturarpassuillu avatangiiserisaat nersornaatisivoq. Tassa ataatsimoorfimmut eqeersimaarfiulluartumut nersornaat Atuarfik Hans Lyngep Nuummiittup ulluinnarni timimik aalatitsinermik suliniuteqarneranut atatillugu tunniunneqarmat.
