Suka K. Mala Høy Kúko Ane Hansenilu isumalioqatigiissitamit tunuartinneqartut

Atassutip isumalioqatigiissitami ilaasortarisimasaata, Siumumullu maanna ilaasortaasup, Mala Høy Kúkop, isumalioqatigiissitamit tunuarnissaa Naalakkersuisut pingasunngormat aalajangeraat, Suka K. Frederiksenip ippassaq unnukkut nalunaarutigaa.

Atassutip Inatsisartuni ilaasortaatitaqarunnaarnera tamatumunnga pissutaavoq, Mala Høy Kúkollu ilaasortaaffia inuttalerneqanngikkallassaaq.

Tassalu isumalioqatigiissitaq arfinilinnit ilaasortaaffigineqarallassaaq.

Aamma Inuit Ataqatigiinneersoq, Ane Hansen, Inatsisartuni sulinngiffeqartoq, isumalioqatigiissitami ilaasortaajunnaassasoq Naalakkersuisut aalajangerput.

Inuit Ataqatigiillu isumalioqatigiissitamut ilaasortaatitassaminnik nutaamik Naalakkersuisunit innersuussuteqaqquneqarput.

- Tunngaviusumik Inatsisissaq pillugu Isumalioqatigiissitap katitigaanerata aaqqiivigineqarnera iluarisimaarpara, tamanna suliakkiissutinut najoqqutassiamut taamalu inatsisartut Naalakkersuisunut Isumalioqatigiissitap pilersinneqarneranut tunngaviliineranut naapertuuppoq taamaasilluni isumalioqatigiissitami sulineq nangittumik ingerlaqqissinnaalissaaq, Suka K. Frederiksen tusagassiuutinut nalunaarummi allappoq.

Isumalioqatigiissitallu suliaminik nangitsinissaa qilanaaralugu naalakkersuisoq allappoq.