Makrellilerngusaannermi IA´p savalimmiormiut tapersersorpai

Atlantikup avannaani makrelertassanut isumaqatigiinniarnerit qaammat kingulleq isasoorput. Savalimmiormiummi Islandimiullu makrelertassanit tamakkiisuniit procentit tallimasisarneri naammaginagit amerlanerusunik pisassinneqarniaraluarmata.

Pisoq ilungersunartussaavoq, tassami Danmark EU´mi siulittaasuuvoq, pillaasoqassappallu timitaliiniartussaassalluni. Folketingimili IA sinnerlugu ilaasortap Sara Olsvigip sorliit illersornerai paatsuugassaanngilaq.

- Uagut IA´miit Savalimmiormiut Folketingimi illersorniarlutigit aaliangiupparput. Massakkummi inuiaqatigiit ikittut 43.000 missaannaaniittut - tassa Savalimmiormiut - nikeriarsinnaajunnaarlugit inissinneqartut takusinnaavarput, tamannalu uagut isumarput malillugu pinaveersartinneqartariaqarpoq.

Tassa naalagaaffeqatitta taama massakkutut inissisimanera uagut pissusissamisoortinngilarput, Sara Olsvig oqarpoq.

Makrelinik pisassiissutissat ukiut sisamassaanni isumaqatigiissutigineqanngitsoorput. Isumaqatigiinniartut tassaapput Norge, Island, Savalimmiut EU´lu. Nunat taakku isumaqatigiissinnaannginnerisa kinguneranik makrelinik pisassiissutit qaangerujussuarneqartalerput.

Savalimmiormiut ukioq manna 150.000 tonsinik makrelinik imminnut pisassinnialersaarlutik oqaatigereerpaat, tassalu ukioq manna makrelit aalisapiluneqaqqittussanngorput. Sara Olsvigilli Savalimmiormiut aalisapilunnialersaarnerat peqqutissaqarluarsoraa.

- Ugguunatigut ajornartorsiuteqarput: Makrelit amerliartuinnarput, uumasoqatigiinnullu allanut sunniutipiluuteqarpoq. Savalimmiuni tamanna ajornartorsiutaavoq ukiunilu arlalinni ajornartorsiutaajuarsimalluni, Sara Olsvig oqarpoq.

Unalu aaqqiagiinnginneq naalagaafeqatigiit akunnerminni angusaqarfiujumasumik aaqqiivigineqarnissaa neriuutiginerarlugu.

- Savalimmiormioq Folketingimi suleqatigisara qanimut oqaloqatigisarnikuuara, savalimmiormiullu uani pineqartumi Folketingimi illersorniarivut nalunaarfiginikuullugu, Sara Olsvig oqarpoq. Suliaq pillugu qallunaat naalakkersuisui oqaaseqartissinnaasimanngilavut.

Savalimmiuni inatsisartut Altingit paasissutissiinerat naapertorlugu Savalimmiormiut makrelit EU´mut tunisarisartagaat 130 millionit koruuninik naleqarput. Siorna Savalimmiuni makrelertat katillugit milliardtimik ataatsimik Savalimmiunut isertittissutaapput.

Siumut sinnerlugu folketingimi ilaasortap Doris Jakobsenip makrelilerngusaanneq pillugu oqaaseqartissinnaasimanngilarput.