SK do Brasil-ip pisiarineratigut tamanna pivoq, A.P. Møller-Maersk ingerlatsivimmi nalunaarummi allappoq. Pisineq 2,4 milliardit dollarsinik - koruuninngorlugit 12,4 milliardinik akeqarpoq.
- Pisineq Brasiliami pisortanit akuerineqaqqaartussaavoq. Maannalu akuerineqarpoq, Maersk Oil-illu Brasiliami suliffeqarfiup aktiekapitalii 100 procentimik ullumi pisiarigai, nalunaarummi erserpoq.
Maersk Oil-ip piginneqatigiiffiutaanit, allamit aqutamit, Maersk Petroleo Brasil-imit pisineq ingerlanneqarpoq.
Uuliamik gassimillu misissuinermik tunisassiornermilu danskit suliffeqarfiannit Brasilia aallussaannut ilaavoq. Brasiliap imartaani Maersk Oil-i uuliasiorfinnik neriulluarnartunik arlalinnik peqareerpoq.
SK do Brasilimik pisinerup Maersk Oil-i uuliasiorfinni pingasuni allani 20 procentimiit 40 procentimut piginnittooqataalersippaa.
- Pisinissaq iliuuserisassatut pilersaarutitsinnut ilaavoq, Maersk Oil-imimi Brasilia pingaarnersatut aallunniarparput, suliffeqarfiup pisortaanera Jakob Thomason, pisinissaq 2010-mi decembarimi nalunaarutigigamiuk oqarpoq.
Maersk Oil Nunatsinni aamma soqutigisaqarpoq. Ingerlatseqatigiit Maersk/Nunaoil qeqertaaluup Baffinip kangerliumarngani 12.000 kvadratkilometerisut annertutigisumi misissuinissamut akuersissummik piginnittuutitaapput. Misissuinerit misiliillunilu qillerinerit neriunartumik kinguneqassappata, uuliamik gassimillu tunisassiorneq ukiut qulit 15-illuunniit qaangiuppata aallartikkumaartoq neriuutigineqarpoq.