Piniartut nerisassanik nakkartitsiffigineqartariaqarsimapput
Piniartut pingasut Aasiaat eqqaanni qeqertami Killerni sikkussaasimasut Issittumi Sakkutooqarfimmit sapaatip-akunnerata massuma ingerlanerani ikiorneqartariaqarsimapput.
Allattoq Mads Lynge
maajip 11-at 2018 15:20
Piniartut sikkussaasimanertik pillugu qeqertamit ingerlariaqqissinnaajunnaarsimapput. Issittumi Sakkutooqarfiup Facebookimi quppernerani tamanna takuneqarsinnaavoq.
Piniartut piffissap ingerlanerani nerisassaataarukkiartulerput. Issittumi Sakkutooqarfik taamaalimmat timmiartoq Challenger atorlugu Killiit qulaavaallugit nerisassanik assigiinngitsunik nakkartitsiffigisariaqarsimavaat. Karsi nerisassanik imalik kigaallassaaserlugu timmisartumit nakkartinneqarpoq.
Kaffit, suppit kissartumik akuinnagassat, iffiat, nerisassat qillertuusarmiut, qallersuutit mamakujuillu karsimiipput.
- Piniartut pingasut ulluni tulliuttuni taamaasillutik nerisassaateqarsinnaalerput, Issittumi Sakkutooqarfik taama ilaatigut allaaserisaqarpoq.
