Maalaaruteqarfik: INI-p akisussaaffini qimarratigivaa

INI A/S-illi  akisussaaffik piginnittunut ingerlateqqippaa tassanngaanniit oqarlutik,  inissianut akiliutit qaffattusaajunnaarsinerisigut INI A/S-ip iliuuseqarsinnananera killileqalersimasoq.

INI A/S-imit sapaatip akunnera kingulleq oqaatigineqarpoq, Aasianni illoqarfiup immikkoortortaata ilaani, inissianik attartortut naammagittarlutik imermik naammattumik uunartoqanngikkallarlutillu kiassaatinilu kissartoqarpianngikkallartariaqartut.

Tassani najugaqarfiup kiassarnermut atortuisa taarsersornissaannut akissaqannginneq peqqutaatinneqarluni. Taamatulli oqariartuuteqarneq Ineqarneq Pillugu Maalaaruteqarfimmi siulittaasup, Morten Nornildip, inatsisit atuuttut naapertorlugit tamanna apeqquserpaa:

- Uanga paasinninnera naapertorlugu akisussaaffik INI-miittuusoq qularnaappoq. INI-p attartortitsisullu qanoq imminnut pissuseqarfigeqatigiinertik, namminneq susassaraat, kisianni maannakkuugallartoq akisussaaffik INI-miippoq.

Taasami piginnittut, tassa Namminersorlutik Oqartussat, suliassat INI-mut tunniussimavaat. Tassami attartornermut akiliutit qanoq qaffasitsiginissaat Namminersorlutik Oqartussat naatsorsorsinnaanngilaat, INI-li taamaaliorsinnaavoq, Morthen Nornild oqarpoq. Taannali Aasianni ajornartorsiutigineqartoq pillugu oqaaseqarusunngilaq.

Piginnittuusut Namminersorlutik Oqartussat, Aasianni suliamut aaqqiissuteqapallanniarlutik teknikerinik misissuiartortitsipput.

Ineqarneq Pillugu Maalaaruteqartarfik, Aasianni ininik attartortunit saaffigineqarsimanngillat. Siulittaasullu Morten Nornildip saaffigineqassagunik, akisussaaffik INI A/S-imut uterteqqinneqarsinnaassasoq nalilerpaa. Aammaluunniit INI inissianut aqutsisutuinnartut inissisimagaluarpat.

- Inissianik attartortitsisarneq pillugu peqqussut naapertorlugu aserfallatsaaliuinissamik akisussaaffik - aammalumi nalinginnaasumik akisussaaneq, attartortitsisumik naammassineqarsimanngitsutut oqarluni maalaaruteqartoqarpat, taava maalaaruteqartarfik aalajangiissaaq, attartortitsisoq INI A/S-ilu allaanerusumik pissuseqaqqullugit, taava taanna INI A/S-ip malittariaqassavaa, Morten Nornild oqarpoq.

INI A/S-imi pisortaaneq Kenneth Hansen, Ineqarneq Pillugu Maalaarrtarfimmit inatsit tunngavilersuutigineqartoq isumaqatigaa. Isumaqatigiinnerli tamaanga killeqarpoq.

Akisussaaffik piginnittumiippoq, Namminersornerullutik Oqartussaasimasut, arlaleriarlutik ineqarnermut akiliutinik qaffaanernut unitsitsisarput. Pisortaanerullu oqaatigaa, taakku peqqutigalugit aserfallatsaalisassarpassuarnik kinguneqartitsisimasut. Tamannalu INI-p pitsanngorsassallugu akissaqarfigisimanngilaa.   

- Taamaammat INI-miit oqaraangatta, akisussaaffik inissianik piginnittut tigumiaraat, tamanna pissuteqarpoq, piginnittut attartornermut akit aalajangertarmagit. INI A/S-illu sunniuteqarsinnaanerat killeqarmat, aningaasat uagut aqussinnaasagut kisiisa atorlugit sulisinnaavugut, Kenneth Hansen oqarpoq.

Taamaalilluni akisussaaffik piginnittunut, Tassa Nammminersorlutik Oqartussanut ingerlateqqippaa.

Tassanngaanniillu Ineqarnermut Naalakkersuisup, Jens B. Frederiksenip, akisussaanermut maalaaruteqarnermulluunniit apeqqut, Ineqarneq Pillugu Maalaaruteqarfiup INI-llu oqaaseqaataat tusaqqaartinnagit oqaaseqqarfigerusunngilai.

- Aasianni ajornartorsiutit aaqqinniaqqaarallartigit, taava kikkut akisussaanersut kingusinnerusukkut takussavarput, Jens B. Frederiksen oqarpoq.