Múte B. Egede toqutsinerit sisamat kingorna: Akuersaarneqarsinnaanngilaq
- Pisut ajorluinnarput akuerineqarsinnaanatillu. Qimagaasut ilaqutaasullu misiginneqatigingaarpakka.
Naalakkersuisut siulittaasuat, Múte B. Egede (IA) 2023-p sakkortuumik aallartinnerata kingorna oqarpoq.
Nunatsinni toqutsinerit pillugit suliat sisamat Kalaallit Nunaanni Politiit suliaraat. Taakkunannga pingasut ullut qulit ingerlaneranni tassa januaarip 31-anit februaarip arfineq-pingajuata tungaanut pisuupput.
AAMMA ATUARUK 25-nik ukiulik ulluni 28-ni tigummigallagassanngortinneqartoq
Toqutsisoqarneranut suliaq kingulleq pillugu politiit paasiuminaallutillu paasissutissanik oqaatiginninngillat. Taamaallaalli angut toqutsinermik nassuerutiginnilluni nammineerluni nalunaaruteqarsimasoq – kiisalu arnap tammarneranut atatillugu suliamik ukiumik ataatsimik affaanillu pisoqaassuseqartumik misissuillutik oqaatigaat. Tassa imaappoq tammaasaqartoqarneranut suliaq aatsaat maannakkut toqutsisoqarneranik suliatut misissuiffigineqarpoq.
- Annersaaneq toqutsinerillu akuersaarneqarsinnaanngillat unitsinneqartariaqarlutillu. Innuttaasut tamarmik toqqissisimallutik inuusussaapput. Inuiaqatigiit ataatsimoortariaqarpugut. Pisut ajorluinnarput akuerineqarsinnaanatillu, Múte B. Egede oqarpoq.
Januaarip 31-anni
arnaq 82-inik ukiulik Nuummi Ceresvejimi inigisamini toqutaasimasoq nassarineqarpoq. Taanna niaqqumigut sakkortuumik arlaleriarlugu anaatarneqarsimavoq. Pinerluuteqartoq tamatuma kingorna arnap inigisaa nalilinnik ujaasiffigeriarlugu ikuallatsippaa. Angut suliamut atatillugu tigummigallarneqarnikuuvoq, suliamilu suli pasisaaqqalluni.
Februaarip 4-aanni
angut 54-inik ukiulik Qaqortumi J. H. Lytzensvejimi inigisamini toqutaasimasoq nassaarineqarpoq. Angutip toqqutigisaa saqqummiunneqanngilaq. Aamma qangarpiaq toqusimanersoq erseqqissumik oqaatigineqarsinnaangilaq, kisianni toqutsineq tallimanngorup ualikkuata arfininngornerullu ullaavata akornanni pisimassangatinneqarpoq.
Suliamut atatillugu tigusarinnittoqanngilaq, politiillu taamaammat Blok I-p aamma Blok H-p akornanni pasinartumik takusaqarsimasut tusaasaqarsimasullu politiinut saaffiginneqquneqarput.
februaarip 8-aat unnukkut kingusissukkut
arnaq 55-inik ukiulik Sisimiuni savimmik kapineqarluni toqutaavoq. Taanna tuaviortumik napparsimmaviliaanneqarpoq, annaanneqarsinnaananili. Taanna toqusimasutut nalunaaqutaq 21.30 nalunaarutigineqarpoq.
Arnaq 25-nik ukiulik nalunaaqutaq 22.20-nngortoq tigusarineqarpoq. Taanna ulluni 28-ni tigummigallagassanngortinneqarpoq.
Suliat sisamaat
taanna 2021-mi novembarip 22-anut atassuteqarsinnaavoq. Ulloq taanna arnaq 35-nik ukiulik Qaqortumi tammaaneqalerpoq. Politiit, qatserisartut, issittumi sakkutooqarfik, namminerlu kajumissutsiminnik ujaaseqataasut ujaasigaluarput, iluatsinngitsumilli. Taanna kingullermik novembarip 22-ani Kommune Kujalliup allaffiata silataani unnukkullu Brugseneeqqap eqqaani takuneqarpoq.
Angut suliamut atatillugu ulluni 28-ni tigummigallagassanngortinneqarpoq, toqutsisutullu pasineqarluni.
Politiit Qaqortumi Vatikanbakkenip eqqaani assaapput. Politiilli sooq assaasoqarnera oqaatigerusunngilaat – taamaallaalli assaaneq toqutsinerit pillugit suliat sisamaannut attuumassuteqarnerarlugu.
Toqutsinerni suliani marlunni tassa Nuummi pisumi Qaqortumilu pisumi tigusarinnittoqanngilaq.
Kalaallit Nunaanni Politiit nunatsinni toqutsinerit arfiniliisut siorna nalunaarsorsimavaat. Ukiumut toqutsinerit agguaqatigiissillugu tallimaasarput.