Lyberthip Søvndahl inissinniarpaa

IWC pillugu septembarimi oqaloqatigiittoqassaaq.

Villy Søvndahlip, kalaallinik tusarniaaqqaarani, danskit/kalaallit arfanniarneq pillugu ataatsimiititaliarsuarmit, IWC-mit, aninissaannik juunip qaammataani oqaaseqarsimanera Karl Lyberthip isornartorsiorpaa.
 
Mattussinissaq ingasappallaassaqaaq, aalisarnermut, piniarnermut nunalerinermullu naalakkersuisoq isumaqarpoq, Villy Søvndahlilu oqaloqatigiartorlugu piffissami qanittumi aallassamaarpoq, ataatsimiinnermilu arferit pillugit siunissami ataatsimoortumik iliuusissat eqqartorneqassapput.
 
Nunat tamat akornanni qanoq nalunaaruteqartarnissaq mianersuuttariaqarparput, Karl Lyberth oqarpoq.

- Taamatut inissisimalernerput ajuusaarnartuuvoq, aalisarnermut naalakkersuisoq Karl Lyberth, Radioaviisimut taama oqarpoq.

Naalagaaffeqatigiinnermi suleqatigiinneq kingumut ajornartorsiorfiuvoq, tamatumuunalu arfattassat, arfernillu angisuunik pisassiissutit Ane Hansen-mut eqqunneqartut pissutaapput.

- Nunatta tungaanit IWC-mik pitsaasumik oqaloqateqaannarnissarput kissaatigaarput, taamaammat Villy Søvdahlip ukiup affaata matuma siorna, uagut oqaloqatigeqqaanngivilluta, Danmarkip IWC-mit aninissaanik oqaaseqarnera ajuusaarnartuuvoq, Karl Lyberth oqarpoq.

Arfanniarneq pillugu ataatsimiititaliarsuaq Kalaallit Nunaata arfattassanik qaffaasimaneranik ataqqinninngippat IWC-mit aninissamik danskit nunanut allanut ministeriata sioorasaaruteqarneranik isornartorsiuineq erseqqilluinnarpoq.

 Ministerili nassuiaavoq IWC tatiniarlugu mattussinngikkaluarluni periarfissat allat tamaasa atorniarsariniarlugit.

 - Nunat allat Kalaallit Nunaanni inooriaatsimik neqimillu pisariaqartitsinermik paasitinniassagutsigit, taava oqaloqatigiinneq, oqaloqatigiinneq oqaloqatigiinnerlu aqqutissaavoq, nassuiaavoq.

Danskit nunanut allanut ministeriaqarfiata arfanniarneq pillugu ataatsimiititaliarsuarmut tunngatillugu periusissaa Karl Lyberthip sunnerniarsariniarpaa. Taamaammat atorfilittanik, ministerinik folketingimullu ilaasortaatitatsinnik marluusunik oqaloqatigiinnissamik aaqqissuussiniarluni sulissuteqarsimavoq.
 
- Danskit nunanut allanut ministeriaqarfiat suleqatigalugu isumasioqatigiissitsinissamik pilersaaruteqarpugut, taamaaliornikkut ajornartorsiutigisatta pitsaasumik aaqqiissuteqarfiginissaa neriuutigalugu - pingaartumik Danmarkimit paasineqarnissarput eqqarsaatigalugu - taamaaliornikkut IWC-mut tunngatillugu ajornartorsiutigisatta aaqqiiviginiarneqarnissaannut ataatsimoorussamik periaaseqarnissarput angujumallugu, aalisarnermut, piniarnermut nunalerinermullu naalakkersuisoq, Karl Lyberth (S) taama oqarpoq.
 
Danmark arfanniarneq pillugu politikkimik aaqqiissanersoq imaluunniit Naalagaaffeqatigiit IWC-mit aninissamik siunniussaqarsimanerat aalajangiusimaneqarnersoq septembarimi paasinarsissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat