Lyberth ukkatarineqaqqippoq

Inatsisartunut ilaasortap, Nikolaj Jeremiassen, aamma Inatsisartut aalisarnermut ataatsimiisitaliaani siuliuttaasup Karl Lyberth maanna aamma qanoq iliuuseqaqqeqquaa.

Nikolaj Jeremiassenimi isumaqarpoq Karl Lyberth ullumimut aqagumullu pilersaarutinik iluarsiissutaasinnaasunik peqanngitsoq.

Niaqornaarsummimi aalisartut ullumikkut silap taarseruttorfiani isseruttulerfianilu pisatik Niaqornaarsummit Kangaatsiamut tuniartortariaqartarpaat Niaqornaarsummi tunitsivik taratsunik amigaateqarluni matoqqatinneqarmat:

- Ulorianartorujummik aalisarneq ingerlavoq. Arlaannik ajutuuallannikkut inuup inuuneranik naleqaannarissamik aalisarnertik ingerlappaat, aalisartoq Julius Jeremiassen oqarpoq.

Royal Greenlandip Niaqornaarsummi tunitsivini aasaq allilerlugu ilavaa. Niaqornaarsummiullu aalisartullu aalaakkaasumik tunitsiveqalernissartik neriuuteqarfigilersimagaluarpaat, kisianni:

- Qaammatip affaa missaarpaa tarajoqarani tunisineq uninngalluni. Sulisartullu sulisinnaanatik suliassaqannginnamik tarajoqanngimmat tunisassiassallu imaaginnavikkaluarlutik, Julius Jeremiassen oqarpoq.

Inatsisartuni ilaasortap aamma Niaqornaarsummeersup, Nikolaj Jeremiassenip, maanna piumasaraa Aalisarnermut Naalakkersuisoq Karl Lyberth qanoq iliuuseqartariaqalersoq. Taassuma Naalakkersuisunut ilaasortaq tapersersoraluarpaa:

- Tapersersuinera uaniippoq ukiunut tulliuttunut siunissarlu ungasinnerusoq eqqarsaatigalugu pilersaarutai tapersersorakkit. Kisianni ullumikkut aqagumullu pilersaarutinik ersittoqannginnami aaqqeerusussutsimik, Nikolaj Jeremiassen oqarpoq.

Nikolaj Jeremiassenillumi Karl Lyberthip nunatsinni tamarmi aalisartut tunitsivissaqarniarmikkut ajornartorsiutai saattariaqalerai isumaqarpoq:

- Una qujanarpoq avannaatungaani pisassanik annertunngikkaluartunik ilassuteqartaarnera. Kisianni kujasinnerusoq eqqarsaatigalugu aalisarnikkut piniarnikkullu inuussutissarsiortut tassani isigineqanngitsutut innerat assorujussuaq ajuusaarnarpoq uanga tunginninngaanniit, Nikolaj Jeremiassen oqarpoq.

Royal Greenlandimit ilisimatitsissutigineqarpoq Niaqornaarsummi tunitsivik aqagu ammaqqinniartoq. Nassuerutigineqarporli aamma taratsunik poortuutissanillu amigaateqarsimasoq, taakkuali maanna inniminnerneqarsimasut. Soorlu aamma Qaarsuniit maanna nassiussisoqarsimasoq ilisimatitsissutigineqartoq.

Aalisarnermut Naalakkersuisoq ilanngutassiaq pillugu oqaaseqartissinnaasimanngilarput.