Lundblad sakkukinnerusumik iliuuseqarnialerpoq

Timersoqatigiit ataatsit aalakoorujussuarsimaneri pissutigalugu tunumi timersoqatigiit tamaasa eqqussallugit aamma naleqquppasinngilaq. Timersoqatigiit ataatsit malittarisassanik unioqqutitsisimanerat pissutigalugu Tunumi timersoqatigiit allat pillarnissaannut tunngavilersuutissanik nassaaruminaassaqassaaq. Nunatta iluani silaannakkut angallannikkut akit taama qaffasitsigitillugit Kitaanut unammiartornissaq Tunumi timersoqatigiiffinnut akisuupilussuussaaq, tamannalumi siulersuisut aalajangiinerminnik siullermik allanngortitsineranut pissutaasimassaaq.

-GBU-p siulittaasuatut ersarissaatitut nalunaarutigissavara Qaqortumi GM-eqarnerani nuanniitsut pisut inuit ataasiakkaat pissusilersuutaat, soorlu B-67 Nuummit arsaqataasut ilaat ikiaroornartulersimaneri inuttaannut tutsinneqassammata, taamatullu K-64 Tasiilaq arsartuisa nakeqqasimanerat klubbiannut tutsinneqarnissaa siunniunneqanngimmat, kisiannili inuit ataasiakkaanut nakkissimasunut tutsinneqassammat, GBU-p siulittaasua oqaluttuarpoq.

Aammattaaq oqaatigaa GBU-mit siunertarineqanngitsoq inuit ataasiakkaat kusanaatsumik timersortartorpalaanngitsumillu pissusilersorsimanerat klubbinut kinguneqapilussasoq. GBU-p siunertarivaa meeqqanut, inuusuttunut taamatullu inersimasunut timersornikkut peqqinnartumik inuuneqalernissaq.

Eqqissiimisoqariarpat aalajangiisussallu piareeriarpata GBU-p siulittaasua siulersuisooqataalu nalunaaruteqaqqissajunnarsipput.