Randi Vestergaard: Kielsenip ukiortaami oqalugiaataa pisussaaffiliinertaqanngilaq
- Malunnartumik Naalakkersuisut siulittaasuata inussiarnisaarluni aamma tamakkiisumik Nunarput katersorniarpasillugu oqalugiarpoq, kisianni aamma taamannak oqalugiaateqarluni tigussaanngilertoortaramik oqalugiaatit, kisianni ataatsimut isigalugu ajunngittorujussuartut nalilerusuppara, Demokraatit siulittaasuat, Randi Vestergaard Evaldsen nersualaarinnilluni taama oqarpoq, nangillunilu:
- Iluarinerpaarpaavara inuiaqatitsinni ajornartorsiutit erseqqissut, imminortarnermut tunngasut meeqqanillu sumiginnaasarneq tunngasut taama ersaritsigisumik oqaatigimmagit. Aatsaavissuaq Naalakkersuisut siulittaasutsinnik taama oqariartuuteqartoqarpoq, taamallu ersaritsigisumik. Taanna assorujussuaq torragivara, Kisianni nersualaarinninneq tassunga killeqarpoq, Kim Kielsenimmi aqqutissiuinera Randi Vestergaard Evaldsenip pikkunartutut isiginngilaa.
- Nuannarinnginnerpaavara uani oqalugiaammi aqqut erseqqissuunnginnera. Oqariartuutinik ulikkaarpoq, kisianni qanoq ililluta angussanerigut aammalu tigussaannginnera, taakku oqalugiaataani amigaatigaakka.
AAMMA ATUARUK Kim Kielsenip ukiortaami oqalugiarnermini kinaassuseq oqaatsillu eqqartorai
Randi Vestergaard Evaldsen oqarpoq nangillunilu:
- Namminiiilivinnissaq eqqarsaatigalugu assorujussuaq aamma eqqartorneqarpoq, kisianni Demokraatiniit apeqqutigiuagarput; Naak aqqutaa, qanoq angussavarput? Aamma taanna oqariartuutigineqanngilaq aammalu aningaasartai namminiilivinnissap tungaanut aamma eqqartorneqanngnillat. Taakku amigaatigisorujussuuvakka.
Randi Vestergaard Evaldsen naapertorlugu namminneq naalakersuisooqataajunnaarnermi kingorna naalakkersuinikkut aqqut allanngorsimaqaaq.
- Uagut sulinitsinni isumaqarpunga piviusorsiornerulluta. Uani soorlu anguniagaq unaannaaleqqapajaarpasikkami namminiilivinnissaq, kisiannilu aqqutissaa iluamik qalipaanneqarani titartarneqaranilu. Uagut peernitsinniit massakkumut nikeriarnerujussuaq taanna tupigusuutigilaartarpara.
Her kan du se Kim Kielsens nytårstale
