Louisianap Issittoq pillugu saqqummersitsinersuaq ammarpaa

Sermeq qilleraluni qaqitaq, qajaq Knud Rasmussenip katersaaneersoq qullartaasiarlu atorlugu Qalasersuarmut angalariaraluarnermik assilisat. Louisianap Issittoq pillugu saqqummersitsinersua ullumi ammarneqarpoq.

- Sunik takorluugaqartarnitsinnik aammalu 1800-kkunni Issittoq pillugu qanoq takorluugaqartoqartarsimanernik ersitsiniarluta saqqummersitsivugut. Sunaana pissutigalugu angutit Sermersuaq itivittarsimagaat? Kalaallit paasisinnaasimanngilaat, taqqavanimi soqarami?, katersugaasiviup pisortaa Poul Erik Tøjner, saqqummersitsinermik piareersaasimasoq oqarpoq.

Saqqummersitsineq ullumikkumut tulluuttuusoraa, Issittormi sammineqartupilussuuvoq.

- Apeqqutit politikkikkut pingaarutillit, soorlu silap pissusiisa allanngoriatorneri, eqqartortillugit, inuit suut tunuliaqutaanersut paasisaqarnissaat pingaaruteqarpoq. Aamma oqaluttuap taama imartutigisup saqqummersinneratigut nunap qanoq pingaaruteqarsimatigineranik paasisaqarnissamut kajumilersitsisinnaassalluta pissutsinulli nutaanut sungiussinissamik paasinninnissamillu pilersitsisinnaanasoraagut.

Saqqummersitsineq sammisanikt arfineq marlunnik immikkoortoqarpoq, taakkunanilu Issittup avataanit isigineqarnerinut tunngassuteqarput. Aammattaaq filimiliortup Ivalo Frankip filmiliaa kingulleq ’Open’, kalaallit tarminikkut nappaatillit pinerluuteqarsimasut oqaloqatigineqarnerimik imaqartoq saqqummersitsinermi isiginnaarneqarsinnaavoq, inuttaatalu tamanna tulluusimaarutigeqaa.

- Tamanna tuluusimaarutigeqaara. Allatut oqaatigisinnaaguanngilara. Nuanneqaaq, tulluusimaaqaluni oqarpoq.

Filmiliami Issittoq pillugu oqaluttuaqataasinnaanera nuannaarutigaa.

 - Filmimi Openimi inuit tallimat Kalaallit Nunaat qimallugu aallarsimanerat, Kalaallit Nunaat pillugu isumaat angerlarsernerallu pillugit apersorpakka. Issittumut isiginnittaasiannut tunngassuteqarpoq. Tamannalu pissutigalugu filmiliara saqqummersitsinermut ilaatinneqarpoq.

Saqqummersitsineq 'Arktis' Louisianap ukiumoortumik saqqummersitaasa pingaarnerit sisamaasut ilagaat. Februaarip aappaata tungaanut saqqummersinneqassaaq.