Libyami Japanimilu ikiuiniarnerit Nunatsinnit tapiiffigineqarput
- Ikiuiartortut Japanimut tikerarnerat ilutigalugu ajunaarnersuaq annertusiartuinnartutut isikkoqarpoq. Japanimi Røde Korsimit peqqissaasut ajunaarnersuarmit annattunut ulloq unnuarlu tarnikkut ikiueqqaarlutik sullipput, Kirsten Mortensen, Kalaallit Røde Korsianeersoq oqarpoq.
Taamatuttaaq Libyap killeqarfiini inuit ajornartorsiortut Kalaallit Røde Korsianit 25.000 koruuninik tapiiffigineqarput. Inuit killeqarfikkoorlutik Tunesiamut qimaasut ullormut 12-14.000-it missaanniittarput.
- Qimaasunut pinasuartumik ikiuinissaq pingaaruteqarluinnarpoq – inuit taakku namminneq nunaminni ikiorneqarsinnaanerat pitsaanerpaajummat, Kirsten Mortensen oqarpoq.
Aningaasat tapiissutigineqartut Kalaallit Røde Korsiata ajunaarnersuaqartillugu aningaasaateqarfianeersuupput. Aningaasat 100.000 koruunit tikillugit nunarsuatsinni ajunaarnersuaqartillugu ikiuinermut ukiumut aningaasaliisissutigineqarsinnaasarput.