Leo Jørgensen imminut toquttarnerup pinaveersaartinneqarnissaanut periusissiassamut inuusuttut allat peqatigalugit ilanngussaqarpoq. Assi: MIO

Leo Jørgensen imminut toqunnermik pinaveersaartitseqataasoq: Imigassamut qimaanak

Imminut toqunnermik pinaveersaartitsineq pillugu nalunaarusiamut inuusuttut 35-t ilanngussaqarput. Leo Jørgensen Ilulissaneersoq taakkununnga ilaavoq, oqariartuutaalu ersareqaluni.

Leo Jørgensenimut piffissaq taarsiorfiuvoq.

Ikinngutigilluakkani imminut toqunnera pissutigalugu annaasaqarpoq namminerlu oqarnermisut ”nakkarujussuarluni”.

Ikinngutiminilli annaasaqarnermini aliasunnermik misigisani allannguinissamut ullumikkut atorpaa. Leo Jørgensenimi 19-inik ukioqartoq imminut toqunnermik pinaveersaartitsineq pillugu nalunaarusiamut inuusuttut ilanngussaqarsimasut 35-t ilagaat.

- Inuusuttut amerlavallaarujussuartut ukiuni kingullerni imminnut toqussimapput, taakkulu pillugit periusissiamut ilaavunga. Kisimiinnanga paasivara allallu ikinngutigilluakkamik imminut toqunnerat pillugu misilittagaat tusarlugu iluarluni, Leo Jørgensen Ilulissaneersoq oqarpoq.

Aliasukkaangama siornatigut aalakoortarnikuuvunga, kisianni iluaqutaanngitsoq paasivara.

Nuna tamakkerlugu inuusuttut 14-init 25-nut ukiullit 35-t suliniut Qamani aqqutigalugu imminut toqunnermik pinaveersaartitsinermut qimagaasullu ikiorneqarnissaannut tunngatillugu misigisimasaminnik pisariaqartitaminnillu oqaasinngortitsinermikkut imminut toqunnermik pinaveersaartitsinermik periusissiamut ilanngussaqarput.

Qamani-nalunaarusiamit innersuussutit (tigulaakkat): Inuusuttunut sammisassat amerlanerusut

- Inuusuttut unnuami ornittagaat – imigassamut inerteqquteqartoq
- Sammisassat amerlanerusut, timersornermi pinngorartitsinermilu (timersornerunngitsumik)
- Ilinniartunut inissiat amerlanerusut. Inissaaleqineq pissutigalugu arlallit angerlarsimaffimminnit nuunniartarnertik ajornakusoortittarpaat
- Inuunermi aningaasartuutit ikinnerusut. Inuusuttorpassuit angerlarsimaannartarput ilaatigut ineqarnermut akiliutip qaffasippallaarnera pissutigalugu

Inuusuttuni peqataasuni affaasa missaat aliasukkaangamik ikinngutiminnik oqaloqateqartartut nalunaarusiami takutinneqarpoq. Aliasukkaangamik pingajorarterutaannaasa angajoqqaatik tapersersuisussatut toqqarusunnerusarpaat.

Ilungersunartut pillugit oqaloqatigiinneq tassarpiaavoq Leo Jørgensenimit ujartorneqartoq.

- Imminut toqunneq pillugu ammasumik oqaloqatigiittarnigut akuttupput. Imminut toqunneq, kinguneri pinaveersaartitsinerlu pillugit toqqaannartumik oqaloqatigiittoqarneq ajorpoq. Sammisaq oqimaannermik paqumigineqartorujussuuvoq, nassuiaavoq.

Navianartumik akuleriissitsineq

Nalunaarusiami innersuussutigineqartut pingaarnerit ilaagaat inuiaqatigiinni inuit tamarmik inummik imminut toqunnissamik navianartorsiortumik oqaloqateqarnissamik ilinniartinneqarnissaat.

Innersuussutit ilaat alla tassaavoq, inuusuttut qinikkanit eqqaamaneqarnissaat inuusuttunullu timersornermi pinngorartitsinermilu sammisassanik amerlanernik aallartitsisoqarnissaa. Pingaaruteqartuaannarporlu inuusuttut tusarnaarnissaat, Leo Jørgensen oqarpoq:

- Inuusuttut inuiaqatigiinnit tusarnaarneqarnerussapput. Kisianni internetsikkut attaveqaqatigiittarfinni takusinnaavara imminut toqunneq pinngitsoortinniarlugu videonik Tik Tokimi ikkussisartut. Tamanna torrattorujussuusoq isumaqarpunga, oqarpoq.

AAMMA ATUARUK Niviaq Korneliussen: Imminut toquttoqartarnera ullut tamarluinnaasa akiorniartariaqarparput

Inuusuttut ilutigitillugu inuusuttunut unnuami orniguttarfinnik amerlanerusunik ujartuipput - imigassartaqanngitsunik.

Imminut toqunnissamik eqqarsaateqaraanni imigassaq navianartumik akuleriissitsinerusoq Leo Jørgensen oqarpoq.

- Inuusuttut akornanni qinngasaarunneq atugaasorujussuuvoq, Kalaallit Nunaannilu imminut toquttut amerlanersaat inuusuttuupput. Taamaammat isumaqarpunga inuusuttut inuunerminnut tunngatillugu imminnut tusarnaarnerusariaqartut. Imminullu toqunnissamik eqqarsaruit imeqinak, Leo Jørgensen oqarpoq nangillunilu:

- Siornatigut aamma aliasukkaangama aalakoortarpunga, kisianni iluaqutaanngitsoq paasivara. Taamaammat inuusuttut imigassamut qimaanatik ikiortissarsiornissaannut innersuukkumavakka.

Inuusuttut nalunaarusiami aamma isumaqarput imminut toqunnissamik navianartorsiortut ilinniarsimasunit ikiorneqarnissaat pingaaruteqartoq. Assersuutigalugu Isumaginninnermut Aqutsisoqarfiup oqarasuaataa Tusaannga ulloq unnuarlu ammasariaqartoq.

Nalunaarusiaq ”Kalaallit Nunaanni imminut toqunnermik pinaveersaartitsinermut inuusuttut innersuussutaat” ippassaq saqqummerpoq tassanilu imminut toqunnerit qanoq pinaveersaartinneqarsinnaanerannut qimagaasunullu ikiuinerup qanoq pitsanngorsarneqarsinnaaneranut innersuussutigineqartut katillugit 40-t sinneqarlutik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl