Lene E: Issittoq pingaartippara

- Issittup nunarsuarmioqatigiinnit isiginiarneqaleriartornera ilisimalluarpara. Aamma Kalaallit Nunaata Danmarkillu suli suliami tassani siuttuunertik attatiinnarsinnaavaat. Ilaatigut Issittumi siunnersuisoqatigiinni taamaappoq, tassanimi Kalaallit Nunaat qanittumik suleqatigaarput, nunanut allanut ministeri Atuagagdliutinut oqarpoq.

Folketingip aasamut sulinngiffeqarnissaq sioqqullugu oqallinnerani Siumup folketingimut ilaasortaatitaanit Lars-Emil Johansenimit siunnersuutigineqarpoq Issittumut tunngasunut isumaqatigiinniarsinnaaneq Danmarkip Kalaallit Nunaannut tunniutissagaa.

- Lars-Emil Johansenip taama oqarnera quiasaarnertut nalilerpara. Naalagaaffeqatigiippugut, Danmarkilu nunanut allanut tunngatillugu politikeqarnermut akisussaasuuvoq, Lene Espersen oqarpoq.

Tamatumunnga atatillugu nunanut allanut ministerip Kalaallit Nunaata allatigut nunat tamat akornanni sulinermini nammineersinnaaneranik nersualaarpaa.

- Kalaallit Nunaata ilaatigut USA-mut EU-mullu pitsaasumik attaveqarnissaa qulakkeerniarlugu Kuupik Kleist annertuumik suliniuteqarpoq. Tamanna ungasinnerusoq isigalugu Kalaallit Nunaannut iluaqutaassaaq, Lene Espersen oqarpoq.

Nunanut allanut ministerip ilanngullugu ilisimatitsissutigaa, Danmarkimi naalakkersuisut kalaallit arfattassatut piumasaqaataannik tapersiisnissamik pilersaaruteqartut, tassa arfanniarneq pillugu suliniaqatigiiffissuaq IWC qaammammi uani ataatsimiilerpat. Tassanilu ilaatigut kalaallit qipoqqarnik ukiumut qulinik pisaqarsinnaanissamut kissaataat akuerineqassasoq innersuussutigineqassaaq.

Danmarkimi nunanut allanut ministeri Lene Espersen aasami sulinngiffeqarnerup kingorna Nunatsinnut tikeraassaaq - qularnanngitsumik aggustimi. Ministerip tusagassiinermut pisortaa Atuagagdliutinut taama ilisimatitsivoq.