Legekæden pinngussat ulorianartut tuniniarunnaarpaat
Pinngussat squishiesit nunatsinni pinngussanik pisiniarfiusartuni Legekædenini marlunni pisiarineqarsinnaanavianngillat.
Pinngussat squishiesit pisiarineqarsinnaanerat unitsinneqarpoq, paasineqarmat pinngussat squishiesit assigiinngitsut aqqaneq marluk akoorutissanik ulorianartunik annertuallaanik peqartut taakkualu meeqqanut unnuami siniffimmiititaqartunut taamaattunilluunniit iniminniititaqartunut, aarlerinartunik akoorutissartaqartut.
Tamanna paasineqarmat pisiniafiit peqquneqarput pinngussat squishiesit assigiinngitsut aqqaneq marluk peerneqassasut, pisiniarfiillu ilaat annerusumik iliuuseqarput, taassalu pinngussat squishiesit tamaasa peersimagamikkit.
AAMMA ATUARUK Pinngussat nuannarisaasut tuniniagaajunnarput
Pinngussanik nioqqutteqartarfiup Legekædenip Nuummiittup, KNR-imut paasissutissiissutigaa, pinngussat squishiesit kingulliit tamarmik piaartumik peerneqartut, nutaanillu inniminniisoqarnissaanik pilersaaruteqartoqanngitsoq.
Pinngussat squishiesi niuertarfimmi tunineqarnerpaaput qaammaatit marluk matuma siorna, kingornalu appariartorsimalluni.
Pinngussanik tuniniaasarfiup Legekædenip Ilulissani niuertarfiata aamma nalunaarutigaa, pinngussanik squishiesinik tuniniaaneq erngertumik unitsinneqartoq, avatangiisinut aqutsisoqarfiup misissuisitsisimaneranik paasisat tusarliunneqarnerata kinguninnguali.
Pilersuisoq squishiesit pineqartut pisiniarfimmini tuniniaanngitsoq tuniniarnissaannillu pilersaartuteqarsimanngitsoq, Pilersuisoq KNR-imut paasissutissiivoq.
Brugsenimeersut Pisiffimmeersullu oqaaseqartinniarlugit persaraagut.